طـيري ، والـسما بلادك

22/1/2010

سنة حلوة يا نسيان، سنة حلوة يا حرية

السلام عليكم ورحمة الله وبركاته.
اعتراف: أقرأ سورة الكهف كل جمعة وهالشيء طبعا ( استغفر الله ) صار من باب العادة أكثر من إنو عبادة مع الوقت. ويصير جدا إني أبدأها وفجأة تنتهي وأنا مو حاسة ولا دارية وش الآيات، وكل ما أحاول أجدد الهمة وأخلص النية أحسن شي يطلع معاي إنو هذي السورة تضيء للشخص مابين الجمعتين وكل ماقرأتها كل ماثبت في مخي فواتحها وبالتالي تقي من فتنة المسيح الدجال. بس للأسف إنو هالشعور يتعاظم لمدة أسبوع والأسبوع اللي بعده نرجع لنقطة العادة مو العبادة

كنت ببساطة أمر على قصة الخضر وموسى عليه السلام وأحس إني منفصلة عنها معنويا ناهيك عن زمانياً ومكانياً وكنت أحس هالقصة غير مفهومة تماما بالنسبة لي، يعني أفهم ايش صار وإيش الي حصل لكني أبدا ما ربطتها في حياتي. ما استشعرت إنها قصة للبشرية! والسبب طبعا إني ما حاولت افهم القرآن بالطريقة اللي لازم نفهمها. احنا تعودنا ع الكم مو الكيف للأسف مع القرآن. المهم بعد ما قرأت ضياع ديني لجيفري لانغ أحس إنو فيه علامة كف على خدي أشوفها لمن أطالع وجهي بالمراية. ليه ؟ لأان هالانسان كان ملحد وأول ما قرأ القرآن ( وهو نسخة مترجمة بعد ) فهم ! وحس ان هالقرآن وسيلة خطاب مباشرة وبدأ يحلل و يربط. وأنا المسلمة اللي من انولدت وانا عرف ربي وعايشة في وسط مجتمع يقيم الصلاة خمس مرات أكثر بطولة اسويها مع القرآن انو افتح التفسير وخلاص احنا تعملنا انو التفسير هو الحكم في الموضوع وصرنا ما نحاول احنا نربط القرآن بحياتنا وزمننا. و وقفناه للأسف على أزمنه ماضية بإرادتنا. المهم مع الدعاء والتدقيق والبحث وتفتيح المخ وعدم ربطه بتفاسير ( بشكل يخليني ما افكر ) قدرت افهم القرآن واشوف الرابطة الحقيقة والخطاب المباشر لنا كعباد. وأول شيء فهمته وغيرني وملأني يقين هو: قصة الخضر وموسى عليه السلام في سورة الكهف *اللي من سنوات اقرأها اسبوعيا بالمناسبة*

راح أقولها بأسلوبي وبنفس المعنى في القرآن وراح أقربها أكثر. هذا لايعني إني أحرف القرآن انا فقط اشرح اللي فهمته : ).

موسى عليه السلام كلنا نعرفه وكذلك الخضر العبد الصالح. الحاصل إنو موسى عليه السلام التقى بالخضر والخضر هذا عبد صالح جدا أعطاه الله الحكمة و العلم، فقاله موسى إنو هو حابب يتعلم منه اللي أعطاه ربي من علم وبصيرة. قال الخضر لموسى يمكن انت ما راح تقدر تصبر على اللي راح تشوفه أو اللي راح أعلمك. لكن موسى عليه السلام أصر وقال إنو راح تلاقيني صابر إن شاء الله. الخضر أخذ موسى عليه السلام في رحلة وأصر على موسى إنو يتلزم السكوت لحد ما يأذن له هو بالكلام. انطلقوا للرحلة وركبوا سفينة وهم جوا السفينة الخضر خرق السفينة يعني أحدث فيها ثقب. طبعا بكل بساطة الواحد يقول ليه ؟! ليه تخرق السفينة وهم ناس مركبينا وموفرين لنا وسيلة مواصلات نقطع فيها البحر :/ اخرتها يعني تخرق السفينة ؟ هالشكوك برضو ساورت موسى عليه السلام وقاله بكل صراحة ليه إنت تخرق السفينة؟ هالشيء ممكن يغرقها ويغرق أصحابها معاها ؟ ايش هذا اللي سويته ؟ هنا طبعا الخضر بكل أدب ما وبّخ موسى لكنه قاله أنا مو قلت لك إنو إنت ما راح تقدر تصبر؟ طبعا هذي تذكير لموسى بالشرط اللي شرطه عليه الخضر و وسيلة لعتاب موسى بطريقة مؤدبة وما تجرح. اعتذر موسى عليه السلام و انطلقوا لحد ما شافوا غلام في قرية. هنا وللمرة الثانية الخضر يسوي شي (يبدو ) إنه فعل إجرامي أو غير عادل :/ إيش سوا الخضر ؟ الخضر قتل الغلام لمن شافه. هنا طبعا أي نفس بشرية بتسوي : :| ليه ؟! ونفس الشيء موسى ما قدر يصبر وعلق ع الموضوع لأانه مو قادر يفهم ليه هالغلام البريء انقتل بدون وجه حق؟ كيف تقتله وهو ما عمل شيء يستحق عليه القتل ؟ كيف تفطر قلب أمه وأبوه عليه ؟ ويستمر الخضر في اسلوب تربوي رائع ويقول لموسى انا قلت لك ما راح تصبر ع اللي تشوفه. قاله موسى خلاص لو سألتك مره ثانية ليه عملت كذا أو ايش اللي حصل فلا تصاحبني بهالرحلة و روح واتركني. وافق الخضر واتطلقوا للمحطة الثالثة في رحلتهم لحد ما وصلوا قرية أهلها معروفين بالبخل والطمع وما يكرمون الضيف فكانوا جوعانين و يبون أكل فطلبوا من أحد البيوت طعام فما رضو يضيفونهم. لكن الخضر وموسى شافوا جدار البيت على وشك إنو ينهار . طبعا كشخص عادي منا ممكن يقول أحسن . او ببساطة يترك الجدار بحكم الانطباع السيء اللي اعطوه ياه أهل البيت و القرية عموما. وممكن الواحد يقول لنفسه يستاهلون هم مره لئيمين وما يستحقون المساعدة. لكن الغريب هنا إنو الخضر رغم سوء خلق أهل القرية معاهم وخصوصا أهل هالبيت راح سوا لهم خدمة وأقام الجدار اللي كان بينهار. وما أخذ عليهم فلوس ولا حاجة. هنا موسى عليه السلام خلاص ما قدر يسكت ! قام قاله لييييه كل هذا؟ الحين احنا نحتاج طعام ولمن طلبنا مساعدتهم رفضوا تروح إنت تكافئهم وتصلح لهم الجدار وبدون أجر بعد؟! والمساكين اللي في السفينة وخدمونا تروح تخرق لهم السفينة ؟ والغلام اللي ماشي في أمان الله ويساوي عيون أمه و أبوه تروح تقتله ؟ بأي منطق هذا يصير ؟ كيف الخير يتقابل بالشر ، والشر يتقابل بالخير؟

طبعا هنا موسى بحكم الاستغراب نسى الشرط اللي بينهم وسأله وبالتالي راح تكون نهاية رحلتهم وما عاد قدر الخضر يتحمل أكثر. قاله الخضر : خلاص هنا نكون منتهين لأنو انت قلت لو سألتك عن شيء بعدها فلا تصاحبني. الحين بعلمك إيش كل اللي راح وليه ؟ وعشان إيش أنا سويت هالاشياء ؟ الحين راح أخبرك بكل صراحة عن الأشياء اللي عقلك ما استوعبها أو شافها غير عادله، راح أخبرك عن الأشياء اللي ماقدرت تصبر وتسأل ليه سويت كذا وليه صار كذا. أما في أول رحلتنا أنا خرقت السفينة (اللي كانت لمساكين يعملون في البحر والصيد)  عشان فيه ملك وجيوشه قريب منهم ياخذون أي سفينة تمر بالغصب. فلو شافوا هالسفينة وهي مخروقة بتكون معيبة عندهم فبيتركونهم يروحون بحكم إنو سفينتهم فيها عيب وما تصلح للملك. أما الغلام اللي قتلته في محطتنا الثانية فكانو أمه و أبوه جدا مؤمنين وصالحين وطيبين وفي حالهم فلو كبر هالولد كان بيكون طاغية وممكن يكون كافر. فهالشيء بيرهقهم وبيتعبهم في حياتهم اكثر من كونه مات وهو ولد صغير. تخيل حجم العقوق اللي بيقدمه لهم لمن يكبر وتخيل كيف راح يفسد في الأرض. ولأن أهله مؤمنين هالشيء بيكون لهم جحيم أعظم من فقدهم لولدهم. فأنا قتلته عشان ربي يبدلهم بصبرهم ولد ثاني رحيم وبار. أما الجدار فكان ملك لغلامين – ولدين يتيمين في المدينة اللي كانوا فيها وكان تحت الجدار كنز تركه أبوه لهما وكان أبوهم صالح ومؤمن فلو انهار الجدار الحين وهم صغار وبهالعمر راح يبين الكنز وبيكونون غير مؤهلين لحيازة الكنز اللي تركه لهم ابوهم. يعني اولاد صغار يا اما بيتخانقون على الكنز او اهل المدينة بيسلبونه منهم وبالتالي راح يعيشون بقية حياتهم فقراء وأيتام، فلو الحين بنيته بيصير عندهم وقت يكبرون ويبلغون اشدهم ويستخلصون كنزهم بنفسهم ساعتها راح يكونون كبار وناضجين وقادرين على التصرف بالكنز بشكل سليم. وكل هالأشياء يا موسى أنا مافعلتها من أمري كله رحمة من ربي وحسن تدبير من عنده لعباده.

تخيلوا معاي لو إنو الخضر ما خرق السفينة ومرت من عند الملك واغتصبوا سفينتهم وهم مساكين مو لاقين شي يأكلونه بعد هالسفينة ؟! تخيلوا الحياة المزرية اللي ممكن يعيشونها! يعني مو كفاية فقر الا وانظلموا بعد ! تخيلوا يا أصدقائي لو إنو الولد كبر وصار طاغية واهله المساكين مجروحين فيه، تخيلوا الولد بعد ماتربى على يدين ناس مؤمنين صار يعثي في الارض فساد والناس تكرهه وتكره اليوم اللي انجاب فيه ولمن يموت يتعاقب في النار ناهيك عن عذاب اهله النفسي ! الحين لمن مات بدري حفظ اهله من هالشعور في المستقبل ونجاه ربي من عذاب النار بفضله ورحمته. تخيلوا لو إنو الجدار طاح وشافوا الكنز اهل القرية الطماعين وسرقوه منهم، إو إنو الاولاد اخذوه واساؤا التصرف فيه ! ولمن يكبرون ويحتاجون لعمل ما راح يلاقون فلوس يبدون فيها عملهم.

هذي القصة لليقين ! لكل شيء يصير حولنا ونعتقد إنه خطأ أو انو الشخص الفلاني ما يستحق الشيء السيء اللي صار له، لكل سؤال تسائلناه عن كثير من الأحداث والقصص اللي تحصل في حياتنا اليومية. ليه أنا اجتهدت وما أخذت المقابل المطلوب؟ ليه هذا الشخص سيء وعنده كل شيء كويس وأموره متيسره؟ ليه هذا الشخص المسكين من مشكلة لمشكلة ثانية؟ وكل وحدة أعظم واكبر من اللي قبلها ؟ ليه الحاجات السيئة تصير لناس كويسين ؟ ليه هالكوارث وهالغرق وهالأمراض ؟ ليه ؟ ليه ليه ؟ من بعد ما فهمت القصة بهالشكل و يقيني في صعود ! إيماني بربي وبقضائه وقدره في صعود، ثقتي في حسن تدبيره في صعود! كل شيء شيء صار لي من قبل وسويت عليه مناحة الحين فهمت ليه صار وليه مشت المواضيع بهالطريقة. كل شيء تأخرت فيه أو ماحصلته بالطريقة اللي أطمحها عرفت الحين انها نعمة مو نقمة ولله الحمد وكل شيء من ربي فعلا عناية وحفظ! هالقصة تخليك تعرف أنو هالكون يمشي بطريقة رائعة جدا جدا ومحكمة وبطريقة عادلة حتى في أدق التفاصيل ومو بس عدل ! لا بطريقة رحيمة جدا جدا من الرحمن الرحيم ! و ربي اللي خلقنا جميعا ولا حدث ولا فشل يستاهل مننا اليأس والإحباط ! لأنو فعلا فعلا ما أصابك لمن يكن ليخطئك وما أخطأك لم يكن ليصيبك. والله إنو كل حاجة صارت ، صارت لسبب، وكل تجربة سيئة هي بالتأكيد تمهيد لخير كبير ودفع لضرر كثير كان ممكن يصيبنا. وآخرتها أمس كنت أحكي مع هادية ( والشاهد الله ) عن سالفة كنت قبل 3 سنوات منهارة انها ما صارت بالشكل اللي أبيه وكنت فعلا مصدقة انو حياتي انتهت وكل شيء بالحياة لازم يتوقف. وإنو ليه من جد صار كذا ؟ وكيف راحت الأمور لهالمجرى ؟ من سنة بس وأنا كل يوم أردد الحمد لله يارب أنو هالسالفة ماصارت بالنهاية اللي أبيها. الحمد لله إنو ما صار اللي كنت أحلم فيه. الحمد لله إنو الأمور سارت بهالطريقة! لاني بس اتخيل وضعي النفسي لمن تمشي الامور زي ما كنت أبي . أظن كنت بكون اتعس مخلوق على وجه البسيطة! ومخلوق مظلوم وعايش في قرف وساكت ! ومخلوق تتحاذف عليه المشاكل من كل الجهات. كنت بكون انسانة مكسورة الخاطر ومجروحة وبعيش وبرتبط مع اشخاص غير كفوء لي من جد. الحمد لك يارب مو لسواك انك خلصتني بطريقتك وشملتني في عنايتك وانقذتني من الدمار النفسي اللي كنت راح احصله وانا اسفة يارب لو اعترضت وقتها كنت جاهلة! وجهلي قضية ثانية اعتذر منها. يارب سامحني .

الشيء اللي لفت نظري بالقصة إنو موسى عليه السلام على الرغم من إنو ربي اصطفاه نبي مع كذا كان يسأل ومن جد مو فاهم ليه كل هالحاجات تصير؟ وهذا دلالة من القرآن بنظري انو عادي نتسائل ونقول ليه؟ عادي مانفهم الموضوع اول شيء ونستغرب الحاجات اللي تصيير! بس الاهم ما تكون هالـ ليه تشكيك في قدرة الله! او عدم ايمان بالقضاء والقدر او اعتراض على مجريات الامور. المهم انو الـ ليه هذي تكون وسيلة نعرف فيها كيف نؤمن بالله وقضائه وقدره اكثر وأكثر.

هذا البوست لكل شخص يعاني من ظروف صعبة، ولكل شخص سارت اموره على غير هواه، ولكل شخص كان يمر بفترة صعبة بحياته. هذا البوست لكل شخص يبحث عن اليقين وعن ايمان اكثر وعن ثقة بالمستقبل. هالقصة عشان تتأكد إنو كل شيء يحصل في وقته المناسب، وفي كل تأخيرة من أمورنا خيرة كبيرة. وكل حدث مكتوب لنا راح نعيشه في وقته الأنسب على الإطلاق فلا تستعجل أي شيء من أمور هالدنيا لانه لو وقتها الحين راح تجي وبكل بساطة : ) .  هذا البوست تخيلوا معاه اهداء يقول: لا تتضايقون كثير على الامور السيئة اللي تحصل، ترا هي خيرة من ربي والصبر والحمد لهم جزاء كبير في الجنة. لا تغضبون انو الامور ما صارت على مرادكم ترا لمن تسير على مراد الله مره احسن وأكرم وأضمن. ثق إنو اللي اختاره الله لك لايمكن يكون أقل من اختيارك لنفسك.

شكرا لـ أ/عمرو خالد. (L)

الأيات من سورة الكهف:
1 – 2 . بصوت ماهر المعيقلي

بدري صح ؟ أعرف إني كثير طوّلت! بس بظل أعاتب المزاج وبظل أعاتب الشغل والزحمة عشان ما أزعل من نفسي و أطلع منها زي الشعرة من العجينة!

إيش اللي تغير ؟ بـ 12 ديسمبر رميت سنة واستقبلت سنة جديدة، وبعدها بـ 20 يوم صرنا بالـ 2010! يعني أيام جديدة كليا، إيش اللي صار بسنة راحت من عمري ؟ أقدر أقول إنو 2009 متذبذة على الصعيد الشخصي والعام. وعلى رغم كل الأشياء المحزنة فيها إلا إني سعيدة جدا ! فعلا هذي هي السعادة إنك تحس فيها من جوا بدون أي مؤثرات خارجية تجبرك تكون سعيد. في سنة ايش صار ؟ وايش تغير في نوال؟ وين كانت و وين صارت ؟
في سنة 2009 ناقشت مشروع التخرج وخلصت منه بنجاح الحمد لله! وتخرجت !، اشتغلت، أخذت أول مستحقاتي نضجت أكثر و أكثر، صار عندي إيمان أكثر من أول بكثير شكرا يارب!
في 2009 صار حدث مهم جدا بالنسبة لي وهي إنو تغلبت على شعور كان يعيقني من أشياء كثيرة، تغلبت على ذكرى حزينه وتناسيت جرح هزني لكذا سنة ! قدرت أكمل حياتي وبلحالي! احتفظت بالأشياء الجميلة من التجارب السيئة وكبيت الذكريات المو حلوة في القاربج حق مخي! أبغي اسوي لها ريستور فقط لمن أحتاجها في أي مرحلة جاية من حياتي إن شاء الله. تخلصت من عادات سيئة ! واكتسبت عادات محببة جديدة. ياجماعة نوال صارت ما تشرب بيبسي من رمضان بطلنا بيبسي . رجعت قارئة جيدة للكتب وبجدارة ! أكثر شيء كان يضايقني من دراستي إنو قراءاتي محصورة لمدة 5 سنوات في مجال التقنية وبلغة وحدة، الحين رجعت وبعنف لعادتي القديمة ولكوني دودة الكتب ، ومدمنة الكتب نوال القصيّر .  في الـ 2009 صرت سنة ثالثة تدوين ! وحاسة إنو بلوقي ما قاعد يتقدم ولا قاعدة أنتج شي من اللي أبيه. والسبب ؟ الكسل ! يعني ستل مو أنا السبب
في الـ 2009 زادت طاقتي الإيجابية بشكل كبير رغم كل الظروف السلبية العامة، وهذا شي أشكر ربي عليه دائما و أبداً.

في الـ 2009 فقدنا عبد الله القصيّر (ولد خالي) بعد مرض عانى معاه بدون ما يقول لاحد حتى آخر شهرين في حياته والحمد لله على كل شيء. سرطان عنيف في البطن ككل. الطحال و القولون و و و . الله يرحمك ياعبد الله ويجمعنا فيك بجناتك، هالدنيا ناقصتك وربي!
في الـ 2009 كانت سنة عالمية غير جيدة سواء على المستوى المحلي او العالمي، بداية بالتقلبات الجوية من غبار عنيف وآخرها كارثة جدة. ناهيك عن نشرات الأخبار اللي ما تاخذ منها غير الهم و الغم، وما استثني الأمراض اللي بدت فيها انفلونزا خنازير ومدري ايش! ونهاية بالاعتداء على الحدود الجنوبية. سنة مقلقة ! سنة مخوّفة، مايندرى سنة عقاب او ابتلاء. يارب ابتلاء.

على صعيد العلاقات الشخصية مافي شي تغير إلا أنو أهلي صرت أحبهم أكثر وأكثر، وصاحباتي نور ورشا ونوف وعروب صرت أحبهم أكثر وأكثر وأكثر وصرت أثق فيهم أكثر واكثر والحمد لله وماشاء الله : ) .وتاكدت أكثر إنو بسمة وإيمان و رزان وديمة وغالية هم من الكنوز اللي طلعت فيها من حياة الجامعة. تعرفت على صديقات جدد رائعين، بدأت تتقلص دائرة الغير مرغوب فيهم في حياتي الشخصية لأني خلاص اتخذت موقف مغاير وصرت أطنش واللي فهم فهم واللي مافهم بيفهم بعدين .

رتبت غرفتي ياجماعة رتبت الحوسة اللي فوق ^ وتكللت العملية برضا أمي وابتسامة انشراح منها بس طبعا مدة بسيطة واكتشفت انو فيه حوسة جديدة لازم تترتب ألا وهي حوسة الكتب صار عندي أطنان من الكتب ( ناهيك عن كتب الجامعة اللي ماتقل صفحاتها عن 400 صفحة ). صارت ريحة الكتب زي الإدمان عندي، ومنظر الكتب متراكمة يعطيني شعور روحاني غريب ! رتبت الحوسة من جديد وصلحت مكتبتي اللي كانت عايشة ع البركة ومهجورة وقسمت الكتب فيها إلى تصنيفات.

البورد نعمة كبيرة من الله! ولذلك عندي 2 هو الوحيد اللي يخليني أكتب أهدافي بشكل واضح والتودو لست تكون قدامي كل ماقمت او نمت ! هالسنة لها نصيبها من تجديدات البورد ماتخلو من صور كتاكيتي جود ولينا وريما ونصيب كبير لورقة فيها أهدافي العامة والخاصة، و ورقة أسبوعية للمهام الواجب إنجازها.
أحد أهدافي قصيرة المدى واللي بديتها من 3 شهور يمكن إنو أساعد 100 شخص بدون ثمن للحين وصلت 73 شخص! يعني باقي تقريبا 27 شخص وأحقق هدفي ! ومره أشكر كل الأصدقاء بتوتر وفيس بوك اللي أعطوني مجال أساعدهم . في هالسنة وخلال أيام قصيرة ان شاء الله راح نكون أنا وبسمة خالصين من جزء كبير من مشروع أكبر نسعى له بإذن الله و متحمسين له.  بسمة وإيمان و أنا رسمنا حدود و علامات مشروع جديد إن شاء الله ويارب يتم يارب يارب ! وأساسا متعة العمل مع هالشخصيتين تخليك تصر إنك تكمل المشاريع وتبدأ في غيرها .
ومن الاهداف لهالسنة برضو إنو أقرا في الـ 2010 وسنتي الجديدة 50 كتاب كحد أدنى  وبنشوف يانوال تنجحين بهالشيء أو لا. طبعا 50 كتاب ممتاز ومضمون كويس ومو روايات فارغة ولحد الحين 5 كتب والسادس بيدي. وطبعا ما يمنع إنو أرجع أعيد قراءة الكتب اللي قراتها سابقا وخصوصا من مدة طويلة. وتبعا لهالهدف اللي لازم ما تكون المنفعة فيه خاصة فيني انا بس قررت إنو كل شهر أنزل بلوق بملخص قراءاتي عشان الناس تستفيد وعشان برضو ما أهمل القراءة ويكون عندي شهريا حاجة ألخصها .
فكرت برضو بعمل دفتر او journal مخصص لـ مراجعات الكتب مع اقتباساتها الأليمة بشكل كولاجي وفني وأشاركه مع الجميع <—هزؤوني عشان ما أتكسل عنه و أسويه .

فيه هدف ما أبي تجي السنة الجاية وانا ما سويته وأبي أحتفظ فيه لنفسي من باب : استعينوا على قضاء حوائجكم بالكتمان. عروب و نورو هدى أختي يعرفونه وإن شاء الله إنو أنا قدها وبسويه وبخلص منه وبتتسهل أموره.

في السنة اللي راحت حاجات جميلة وصلتني من صديقاتي الجميلات أولها عدسة كاميرا أليمة من أحسن صديقات بالكون ( طبعا يعني نور ورشا ونوف ). والشعور الجميل لمن تكون نايم ولمن تصحى وتشغل النور تلاقي على الكرسي كرتون أحمر بعدين ما تستوعب وشو هذا وتقعد بالسرير ربع ساعة تطالعه ، وتخمن إيش جواته! بعدين تقول أكيد أختي هدى جايبة لي أكل * مشكلة الجوعانين * ولمن تتكرم وتقوم من السرير تلاقي اسمك ع الكرتون :|
بعدين تستوعب انو ( طرد ) من بريطانيا، ومن ورا مكتوب اسم صاحب الطرد . :”( ولمن تفتحه تلاقي شخص جميل ما قابلته ولا قابلك لكنه من طيبته يتذكرك زي شخص عشت معاه مدة طويلة. تلاقي شخص عنده قلب جميييل تذكرك بشيء إنت تحبه كثيير وأرسلك حاجات تهتم لها وتشوف فيها معاني كبيرة. شكرا شكرا يا شوكولا على أغراض الكرافتس الحلوة ! أتعب أقول شكرا يكفيني إنها منك وربي. الشعور الجميل الثاني تقولك إيمان ع القوقل توك إنو فيه لك وديعة من أيام الجامعة وإنو لازم ترجعها لي :/ وانا مره ما أتذكر إنو إيمان أخذت شي مني وما رجعته و لمن أخذتها :”( كنت فعلا محتاجة أبكي هذيك اللحظة لأنو اكتشفت إنو هالشيء هدية وقاعدة تموّه والهدية طبعا تبكي لعدة أسباب أولها إنو الهدية صارت من إيمان و بثينة الحكمي :”( البنت اللي دخلت قلبي بسرعة البرق ! ولانو الكتاب لأحد كتابي المفضلين واللي يكاد تكون كتبه نادرة الوجود هنا !
الشعور الفظيع رقم 3 إنو لمن تدخل غرفتك وترجع تلاقي الباب مقتوح وتقول : ايش هذا مايحترمون خصوصيتي ويفتحون باب غرفتي وتمشي في امان الله وتشوف قدامك كيس هدية وأشياء خطيرة وقسم كنت احسبه بالغلط وإنو لاختي الثانية ويبون رايي في الهدية <—ماتعودت بعدين أفتح الكيس تطلع هدية من أختي الخطيرة هدى والهدية شنطة برادا ألييييييمة ! وصرنا The Nawal wears Prada . الشعور المتألق رقم 4 إنو في يوم 12 ديسمبر تدخل وتلاقي على سريرك كتابين كنت تبيهم و واحد على وجه الخصوص كنت ميت تبيه بعدين تبدا تقول اااع ااااع هذول حقاتي والا وشو ؟ الا يجي أخوك العزيز الخطير ويقول ايه لك مبروك . شكرا لكل شيء حولي سلبي أو إيجابي ! شكرا لأهلي العظيمين شكرا لصديقاتي العظيمات، شكرا لكل شيء أضفتوه في السنوات اللي راحت والجاية بإذن الله. شكرا لكل من قال لي كلمة حلوة في بلوقي او كلمة سيئة الأكيد إنو استفدت منها بطريقة أو بأخرى. شكرا لكل اللي عاتبوا وسألوا عني فترة الانقطاع عن التدوين، صدق صدق انا اسفة لو طولت هالقد! مره انا اسفة كثير لو ما قدرت ارد عليكم كلكم بالفيس بوك أو توتر او بإيميلي. شكرا وربي لـ 36 شخص اللي مرسلين بالفيس بوك و اللي مارديت عليهم مره اسفة بس وعدت نفسي ما أرد على أحد الا بلنك التدوينة الجديدة ! لاني رديت عى رسائل من قبل وتفشلت ما نزلت بلوق ولا شي شكرا لأصدقائي الجدد الرائعين والكريمين : ) شكرا للشعور الجميل اللي يضيفونه لحياتي السعيدة . شكرا للناس المخلصة لبلوقي أكثر مني واللي تزور وتعلق وتتواجد دائما ! انتم السبب الأول بعد الله إنو انا مستمرة تدوين. شكرا لكل شيء للأشياء اللي راحت والأشياء اللي قاعدة تصير وللأشياء القادمة ، ممنونة كثير لكل تجربة جميلة ولكل تجربة سيئة ! وربي الحياة بكل جوانبها نعمة كبيرة وهبة من الله ! يارب قدرني وأعني أحافظ على هبتك ونعمك اللي اغرقتني فيها. شكرا لك أولا وأخيرا يا الله على كل الأشخاص الجميلين المحيطين فيني ، وعلى قدرة التطنيش والترفع في مرات كثيرة عن أي أحد سيء همه إنه يتكلم فيني بالسوء. شكرا لأنك وهبتني النور في حياتي، يارب لاتحرمني من هالنور واللي يقرا في آخرتنا. يارب أحبك واحب الحياة اللي وهبتني إياها. احب أهلي وأحب أصدقائي وأحب تفاصيلي. أحب وجودي وكياني! أحبك يارب ، يارب املئ قلبي بحبك. واللي يقرا يارب : )