طـيري ، والـسما بلادك

كيف أصنع دفتر يدوياً ؟

تقريبا من سنتين ونص خضت تجربة العمل الخاص، وبعت دفاتر عملتها يدويا في أحد البازارات. راح أنشر تجربتي قريب <- – بدري مره ترا
المهم بعدها صرت أتلقى طلبات من الناس القريبة ، ويعطوني اللي يبونه في الدفتر ، مثلا مقاسه وشكله و شكل الورق وأنا أحاول قد طاقتي وأسوي اللي أقدر. حبيت أشرح الخطوات البسيطة لعمل دفتر يدوي، بعض الناس تحب تعمل اشيائها بنفسها وكنوع من نشر الفائدة راح أنشر دفاتري وكيف أعملها وإيش الخامات اللي استخدمها. هالمرة راح أشرح طريقة دفتر مبسط وحجمه صغير، عملته قبل كم يوم عشان يكون مكان لأفكاري ، آخذه معاي وين ما أروح، أسجل فيه أفكاري وأهدافي الصغيرة والكبيرة، اللي ناوية أبداها واللي مو ناوية .

بسم الله نبدأ.

الخامات والأدوات :
#ورق كرتون ( أي كرتون في البيت ، كرتون بيبسي – مناديل أي شيء يمشي حاله )
#أوراق تغليف ( بعضها كنت مشتريتها وبعضها بقايا اوراق من هدايا )
#أي شيء تفضلونه للتزيين سواء شرائط او أزرار. كله يرجع لذوقكم.
#مقص – صمغ.

أولا:
أقص الكرتونة بحسب المقاس اللي أبي. مرات أكتفي بقصها ،( ومرات أنزع الطبقة اللي فوقها عشان تظهر خطوط الكرتون، وتعطي شكل جميل ).

ثانيا:
أبدأ مرحلة تزيين الكرتونة بأي شكل أنا حابته. في هالدفتر اخترت أزينه بأوراق تغليف بطريقة عشوائية وبألوان مختلفة. أول شي لصقت القطعة اللي فيها ورود بنفسجية، وفوقها لصقت القطع الثانية زي ما هو موضح بالصور:

بعد ماخلصت مغطية الكرتونة بورق التغليف، حبيت أضيف شي زيادة من شيء أحبه. شخصيا أحب الريبونز المنقطة، فاخترت هاللون وقررت أحطه في أحد الزوايا:

* كانت فكرتي بهالطريقة ، انو زي ما يحطون ريبون أسود على صور الأشخاص المتوفين، أنا احط ريبون بلون مليان نشاط وبشيء أحبه، أبي أعبر عن الدفتر بطريقة أنو يحمل حياتي وأفكار حياتي، وتجاربي البسيطة وأهدافي المعلنة وغير المعلنة.. ببساطة دفتر الحياة.

الحين بعد ماخلصت تماما الغلاف، بقى الورق الداخلي + السلك. شخصيا أفضل السلك لأنو مرات جربت أخرم الكرتون مع الورق واربطهم بشريطة، بس طلعت الفكرة غير عملية خصوصا لدفتر راح أستخدمه كثير. فصرت أسويه سلك. أخذت ورق أبيض A4 لانه مو مسطر ، ما أبي أي سطور ! أبي ورقة ( بيضاء حرة ) وقصيته على نفس حجم الغلاف، وأخذته المكتبة وطلبت منه يسوي له سلك . والنتيجة :

بإمكان أي احد يصنع الأجمل إذا استخدمنا خيالنا وأفكارنا البسيطة. الأشياء اللي من صنع يدنا ونتيجة لأفكارنا راح يكون لها معزة خاصة عندنا حتى لو تطورت مهاراتنا. راح تبقى تحمل معاها ذكريات اليوم اللي عملت فيه هالشيء، وراح تظل تحمل معاني كبيرة داخلك. جربوا تصنعون ولو حاجة وحدة بس بيدكم وبجهدكم. توفير مال واستثمار جهد و وقت ومتعة في حاجة ترافقك طويلا : ) .

السلام عليكم ورحمة الله وبركاته، موضوعين ممكن اقرأ فيهم يوم كامل بدون ما أحس على نفسي:
1- بداية الخلق
2- نهاية الكون وقيام الساعة.

على أبواب الملحمة، الكتاب اللي التهمته في غضون ساعتين ونص! كان هالكتاب يتكلم عن الموضوع الثاني، عن نهاية الخلق والكون ، وعن ملحمة أو حرب آخر الزمان، وممهدات قيام الساعة، وممهدات الملحمة نفسها. الكتاب تكلم عن تنبؤات الرسول عليه الصلاة والسلام عن الحروب والأشياء اللي راح تصير في وقت لاحق. برضو الكتاب تكلم عن تنبؤات الانجيل والكتب المقدسة، و أورد تنبؤات لـ نوستراداموس من المرجع : تربيعات نوستراداموس. ( ما أحس له داعي ذكر تنبؤات هالانسان صراحة )

يصنف الكتاب على أنو رواية، تدور احداثها في مجلس العلامة : عليم الدين وطلابه اللي من ضمنهم الكاتب ( صلاح الراشد ). قسم الكتاب إلى 7 جلسات:

الجلسة الأولى: فتنة الأحلاس – حرب الكويت والعراق.
الجلسة الثانية: الحرب العالمية.
الجلسة الثالثة: الملحمة الكبرى أو هرمجدون.
الجلسة الرابعة: مؤشرات الملحمة.
الجلسة الخامسة: صفات القائد العربي المنتظر.
الجلسة السادسة: الرجل الشرير والمسيح المنتظر.
الجلسة السابعة: التغيير في المستقبل.
التغيير بالزمن.

الكتاب يحتوي معلومات منوعة في شتى العلوم، النفسية والاجتماعية وتطوير الذات، والعلوم الشرعية وعلوم الاديان. على انو الكتاب مايوحي بهالشيء لكن لما تقرأه راح تلاحظ كمية المعلومات اللي فيه. من أكثر الأشياء اللي اعجبتني في الكتاب إنو الدكتور صلاح قدم للقارئ سبب قراءته للأشياء المستقبلية ( في حين انوا لكثير يبتعدون عن هالاشياء بسبب الخوف ). واستشهد بآيات على ضرورة الإحاطة بالظروف الجاية. أول ما تقرأ الكتاب راح تصاب برعب، واحباط لكن على حسب توصية الدكتور كان يقول: اللي بيقرا الكتاب باول فصوله لايقراه او يقفز لآخر الفصول. لأنو أول الفصول راح تعطيك شعور سلبي وخوف لكن بمجرد ماتقرأ الفصول الأخيرة راح تحس بشعور ايجابي وبكمية التغيير اللي تقدر تسويه، ممكن بالإيجابية لكل شخص تخف حدة الظروف الصعبة على المؤمنين. الجميل انو الكتاب ما يتكلم عن فترة آخر الزمان بالطرق الاعتيادية اللي نقراها، لا الكتاب يعطيك خطة بسيطة كيف تواجه الظروف في حال الحروب النووية ، وايش اللي ممكن تدخره او كيف ممكن تكون عضو فاعل في مجموعتك. جدا أعجبتني هالنقطة وحسيت انو ما راح استغني عن الكتاب في مكتبتي. باختصار الكتاب ما يكتفي بالشعور السلبي او الخوف وفقد الامل، بالعكس الكتاب يعطيك شعور إيجابي تجاه كل المجريات.

لمن تكلم عن فترة المسيح الدجال تمنيت إنو أموت قبل ما أحظرها :”( شيء يخوف فعلا هالفتنة! بس لمن اقرا عن فترة وجود المسيح عليه السلام وفترة السلام اللي ما عاشت زيها البشرية من اولها أشتاق أعيش هالفترة :”( دايمن أقول احنا جيل انولد في حروب و أوضاع سياسية سيئة جدا! نفسي من جوا تحن لفترة سلام وسط نبي من الله. أبي أجرب شعور اللي يكون بيننا نبي مرسل من الله! وانتوا كيف تحسون ؟

فيه أشياء تكلم عنها الكتاب جدا رائعة منها:
* السبب المتوقع لحث الرسول عليه الصلاة و السلام لأمته صياح الأيام البيض.
* مراحل نشاط المخ ( بيتا – ثيتا – الفا …الخ) وضحت لي أشياء كثيرة كنت أجهلها لمن مودي يتعكر فجأة :/ راح اتكلم عن هالشيء في تدوينة قادمة بإذن الله. الله يحفظنا وإياكم من سوء الفتن.

أنصح بالكتاب وبشدة، حتى للي يخافون من هالأمور.
اسم الكتاب: على أبواب الملحمة.
المؤلف: صلاح صالح الراشد
السعر : فوق الخمسين ريال ما أتذكر بالضبط كم. – من مكتبة جرير
عدد صفحات الكتاب: 242 صفحة

* من هو نوستراداموس؟ | نبوؤاته
قراءة ممتعة.

بسم الله الرحمن الرحيم، السلام عليكم ورحمته وبركاته جميعا <- – فيسي وانا لابسة نظارة واقرأ كتاب وجمبي كوب من القهوة لأحتسيه وأتلقى اتصالات من المثقفين الآخرين

لازلت أؤمن بضرورة القراءة في الإيمان و ثبوتية وجود الخالق على الرغم انو ما يساورني اي شك في هالشيء، ولا زلت أقول للي يقولون هذي الكتب فقط للي عنده أفكار إلحادية: المواضيع هذي مهمة للمؤمن ليزيد ايمانه بربه، ويزيد تعظيمه للخالق ، لان الانسان يحتاج يتذكر بين فترة وفترة عظمة الخالق و اتقانه للكون من حولنا. وبنفس الضرورة يحتاج اللي يشك يقراها حتى يرد إلى الصواب و الفطرة.

من فترة كنت ادور كتاب: رحلتي من الشك إلى الإيمان – د.مصطفى محمود. والحمد لله ربي يسر لي وحصلته بجرير مع مجموعة أعمال اخرى له.

بالضبط ! هذي نوعيتي المفضلة من الكتب ، وهذا الاسلوب في الطرح اللي يعجبني. الفكر اللي زي كذا ، واللي يعترف بفترات سابقة بدون أي خجل او تستر ويستخدم أفكاره السابقة الغلط كـ وسيلة دعم لأفكاره الجديدة يخليني بدون أي تردد أصنف هالشخص من المفضلين عندي. وهذا اللي صار بالضبط مع هالكتاب ومع الدكتور. يتكلم الدكتور باختصار عن كيف غره تفتح عقله في البدايات إلى اعتناق افكار مغلوطة عن الخالق و وجوده وكيف استمر يبحث لمدة تزيد عن الثلاثين سنة عن الخالق و الكون والحياة. أسلوبه في طرح البراهين ونقضه للأفكار الخطأ عن الخالق جدا يسحر ! من غير مبالغة كل شوي اقول : سبحان الله – لا إله إلا الله ! انا ما عندي شك بالخالق ولله الحمد. لكن هالكلام يزيد ايماني اكثر. يحثني على التغيير اكثر . الكلام اللي يخاطب عقلي فقط ويوجه عقلي للتعامل مع كل اغلاطي وحسناتي هو اللي يأثر فيني.

الكتاب عبارة عن 8 فصول أو أبواب:
1- الله.
2- الجسد.
3- الروح.
4- العدل الأزلي.
5- لماذا العذاب؟
6- ماذا قالت لي الخلوة؟
7- التوازن العظيم.
8- المسيح الدجال. <- – فيس يناظر عروب

بيظل هالكتاب من الكتب اللي لايمكن أنساها، وراح أرجع لها بعد فترة. وما راح استغني عنه في مكتبتي، واظن مثل هالكتب لازم تكون موجودة في مكتبة كل احد منا. نحتاج هالكتاب وغيره عشان نتجدد ونرجع مره ثانية لله، للحياة الصح. نرجع للإيمان ونتحلل من المادة والحياة القاسية الجافة الصعبة!

اسم الكتاب: رحلتي من الشك إلى الإيمان
الكاتب: د.مصطفى محمود
الناشر: دار أخبار اليوم.
السعر : 10 ريال من مكتبة جرير
عدد الصفحات: 127

اقتباسات أليمة:

المقطع هذا حسيت اني ابي أبكي لمن قريته :”( :

من أكثر الفترات اللي أنجز فيها أو أتغير ، أو أطلع بقرارات جديدة كويسة تكون وانا منعزلة فترة عن كل شيء:

و:

“ إذا خفيت عنا الحكمة في العذاب أحيانا.. فلأننا لا ندرك كل شيء ولا نعرف كل شيء، ولا ندرك من القصة إلا تلك المرحلة المحدودة بين قوسين اسمها الدنيا.. أما ما قبل ذلك ومابعد ذلك فهو بالنسبة لنا غيب محجوب.. ولذا يجب أن نصمت في احترام ولانطلق الأحكام.. “

“ الكيمياء والطبيعة والكهرباء هي العلوم الصغيرة. والدين هو العلم الكبير الذي يشتمل على كل العلوم في باطنه. ولا تعارض بين الدين والعلم ، لأن الدين في ذاته منتهى العلم المشتمل بالضرورة على جميع العلوم. والدين ضروري ومطلوب لأنه هو الذي يرسم للعلوم الصغيرة غاياتها وأهدافها ويضع لها وظائفها السليمة في إطار الحياة المثلى..
الدين هو الذي يقيم الضمير .. والضمير بدوره يختار للطاقة الذرية وظيفة بناءة.. ولا يلقي بها دمارا وموتا على الأبرياء..
وهو الذي يهيب بنا أن نجعل من الكهرباء وسيلة إضاءة لا وسيلة للهلاك. “

—————————————————————————————————————-

أنا أحس استفدت من الكتاب مو لأشياء كنت أجلها، لكنه جدد فيني الإيمان واطمأن قلبي أكثر. وزاد حبي للخالق. وزي ما شاركتكم أشياء كثيرة ابي أشارككم هالشعور. أبي زي ماحسيت تحسون ، وزي ما حسيت بسعادة ابيكم تحسون زيها وأكثر.
من يدري يمكن ربي يرحمنا بشيء نقراه بإخلاص، او بتسبيحة أخلصنا فيها، رحمته واسعة وعدله نافذ. يارب اشملنا برحمتك، اشملني مع اصدقائي في المدونة

السلام عليكم ورحمة الله وبركاته. أعيش هذي الأيام فترة قراءة مثمرة جدا ولله الحمد. أحس الرغبة بالقراءة رجعت لي مره ثانية بعد ما كانت قراءاتي منحصرة في تخصصي والتقنية بشكل عام.   من الكتب اللي قرأتها وسجدت شكر لله إنو يسر لي قراءتها وفهمها هي :

سلسلة كيمياء الصـلاة . د/احمد خير العمري. هذي السلسلة مكونة من 5 كتيبات:

*المهمة غير المستحيلة.
* ملكوت الواقع.
* عالم جديد ممكن.
* فيزياء المعاني.
* سدرة المنتهى.

في كل جزء تناول الكاتب حيثية أو مفهوم من مفاهيم الصلاة من بدايتها لحد نهايتها. في الجزء الأول تكلم عن دور الصلاة في التغيير، وكون الصلاة بحد ذاتها معول التغيير اللي يتيح لنا بناء الحضارات في العالم في حال لو اقمناها بالشكل الصحيح.

الجزء الثاني يتكلم عن ممهدات و حوافز قبل الانطلاق في عملية التغيير والاستخلاف في الأرض، هذي الممهدات و الحوافز تتمثل في النداء للصلاة، وفي سر الأوقات المشروعة للصلاة.

الجزء الثالث مخصص لسورة الفاتحة. فاتحة الحياة، فاتحة الكتاب، فاتحة الصلاة وفاتحة التغيير.
الفاتحة اللي صرنا نقرأها بدون اي تدبر لمعانيها العظيمة وبدون ما نستشعر انها من السور اللي تحدد علاقتنا مع الخالق وبالتالي تحدد علاقتنا مع نفسنا وعلاقتنا مع اللي حولنا ، وعلاقتنا مع التغيير ودورنا فيه! الفاتحة اللي ترسم خط حياتك بشكل عام.

الجزء الرابع يتكلم عن هيئات الصلاة ، القيام – الركوع – السجود وكل التسبيحات اللي نقوله في الركوع و السجود ومعانيها وعلاقتها بالتغيير. لأن يستحيل ان تكون الصلاة مجرد حركات لا معاني فيها !

الجزء الخامس والأخير تصل معه إلى ذروة التغير.. عن الجلسة الأخيرة في التشهد الأخير. يتكلم عن الصلاة الابراهيمية وعلاقتنا بالانسان الأهم في حياتنا: الرسول عليه الصلاة و السلام. و وجوده الحاضر معانا رغم موته الجسدي. اتصاله بكل محفزات التغيير والبناء في الأرض رغم انه في قبره.

باختصار: انا محظوظة لمن قرأت الكتاب، وأبغى لكم نفس حظي! وشكرا اولا وآخرا لله اللي ييسر لي اختيار الكتاب وييسر لي قراءته.. وييسر لي فهمه على الشكل الصحيح على ما أظن. شكرا يارب لانك أردت لي الخير وصرت أفهم معنى الأذان وتجاوز فهمي انه مجرد نداء للصلاة لكونه نداء للحياة كلها. شكرا ياربي انو صرت افهم احنا ليه نقول الله اكبر وليه الفاتحة بالذات في كل الركعات. صرت اعرف ليه نجلس وليه نتشهد، وليه نسبح باسم الله العظيم وباسم الله الاعلى في الركوع والسجود. تجاوزت التفكير من انو ابي اصلي بس عشان تحط عني عقوبة تارك الصلاة. وصرت اعرف تماما انو انا لمن اصلي بخشوع وفهم ومحافظة على الاوقات هالشيء يتيح لي اني اكون جزء من منظومة التغيير وبالتالي حققت ولو شيء قليل من مبدأ الاستخلاف في الأرض. تغيرت فيني اشياء كثيرة لمن قرات الكتاب، وقفت باختياري وبدون تعب ولله الحمد اشياء اظن انو ربي ما يحبها، بعدت عن كثير عادات سيئة. وقاعدة احاول انو استمر في التغيير. هالكتاب أكد لي الشعور انو ديننا شيء عظيم ! اعظم رسالة في تاريخ البشرية! اعظم دين منذ الازل! أعظم تعاليم وأجمل شريعة .

لو كنت تسأل نفسك دايمن انا ليه ما اخشع في صلاتي، وليه نقول الله اكبر؟ وليه نسجد ونركع ؟ ولو سألت عن هالاشاء وكانت الإجابة نمطية، -صحيحة ما اقول خطأ- لكنها نمطية لدرجة ماعادت تأثر فيك ، ولا تقدر تستشعر المعنى فيها. أنصحك بهالكتاب بشدة. ولا تخاف الكتاب يحفزك على البداية ويعطيك تصور انو الوصول لمرحلة الخشوع التام صعب ومو بهالسهولة لكن يكفيك انك على الطريق والوصول بإذن الله راح يتم.

السلسلة أخذتها من مكتبة جرير/ سعر كل كتيب: 11 ريال. وسمعت من البنات إنو موجودة برضو في فروع كارفور.
الناشر: دار الفكر
معدل صفحات السلسلة: 145 صفجة تقريبا.
أسلوب الكاتب: فظيع !! جدا جدا رائع وسلس. و واضح تمكن الكاتب من اللغة العربية ، و واضح انو  بحث كثير في اصول الكلمات ومعانيها عشان يفهم الصلاة ويفهمنا اياها. عند الكاتب قدرة جميلة في الربط بين الأشياء وتحليلها بشكل منطقي غير مستغرب على العقل, ولهالسبب اعجبني الكتاب كثير كثير. د.احمد طبيب أسنان ولد في بغداد ومقيم في دمشق.

اقتباسات من الكتاب: ( حاولت اختصر كثير ):

واقتباسي المفضل على الإطلاق:

“ كان من المؤلم جدا أن الناس لا يصلون.. ولكنه كان من المؤلم أكثر، أنهم إذا صلّوا ، ربما لا يتغيّرون. “

وأعجبني جداً :

“ الخليفة في الأرض، قد يكون، رأس الدولة، لكن ذلك لا علاقة له بمنصبه هناك، وإنما بما يفعله هناك، بالقيم التي تتحكم فيه بينما هو هناك، هل هو ملتصق بقيم الاستخلاف؟.. هل هو واعٍ في مهمته في الأرض؟ هل يؤدي ما يؤديه وقد وضع هذا نصب عينيه، قبل منصبه ؟”

“ إن بائعة اللبن، التي رفضت مزج اللبن بالماء، وسمعها الخليفة عمر، في الحادثة المعروفة، كانت هي أيضاً تمارس الاستخلاف في الأرض.. رغم أن وظيفتها كانت مجرد بائعة لبن.”

يلا نصلي ، يلا نغيّر !

The invisible wall

*

Önyargılarımız…Görünmeyen duvarlarımız from Bulent Keles on Vimeo.

كم من الأشياء حال بيننا وبينها جدران غير مرئية ؟ ربما كانت من صنعنا أو من صنع من هم حولنا ! لنكسرها ولننطلق !

السلام عليكم ورحمة الله وبركاته.
قبل كم يوم كنت أشوف حلقة من حلقات القادمون ( سلسلة تتحرى ظهور المسيح الدجال والامام المهدي وعيسى عليه السلام). في أحد الحلقات لفت نظري فيديو عن تأثير أفعالنا في الأطفال. بحثت عنه وبسرعة لقيته ( المقطع فيه موسيقى – فيه الـ F sign )

انا ما أقول إني تفاجئت لمن شفت المقطع، لا بالعكس كل شيء يكون بالمستقبل هو غالبا نتيجة حتمية للي قاعدين نسويه اليوم، واللي احنا فيه نتيجة حتمية للأجيال اللي قبلنا * إلا من رحم ربي*. احنا دائماً نقول نبي نغير ونبي نغير. وكلنا نعرف إنو التغيير ما يجي بساعة ولا يمكن بسنة ! التغيير اللي نطمح له في مجتمعنا وأمتنا راح يتحقق على مدى سنوات ويمكن أجيال، لكننا نطمح إنو نلاحظ بوادر التغير من بدري، من هالمقطع بالذات ترسخت الفكرة في بالي أكثر من أول، فكرة إنو: عشان تغير لازم تغير من نفسك أول، لازم تغير سلوكياتك مو بس أفكارك لأان تغيير الفكرة أسهل من تغيير السلوك، لو تغيرت وتعدل سلوكك راح تكون غيرت بشكل مباشر على نفسك وبشكل غير مباشر على مجتمعك.. ليه غير مباشر؟ أحد ( ما ) راح يلاحظ تصرفاتك ويعجب فيها بما إنها (صحيحة ان شاء الله ومنطقية) وهالأحد ممكن يقتبس من تصرفك أو بأقل الأحوال بيخزن هالتصرف في باله ويطرحه في أي مجلس نقاش، في هالمجلس أحد ( ما ) راح يطبقه ولو بعد مدة، وهكذا .. برضو : الأطفال من حولنا لازم لازم نحط فيهم جهد كبير واكبر من الجهد اللي على أنفسنا، لأن الطفل (يرى ) و يفعل ( مايراه ) . يشوف أبوه أو اخوه الكبير يتلفظ بألفاظ سيئة ويسوي نفسه! يشوف أبوه يضرب أمه ويضرب اخواته، يشوف اخوه الكبير يسوي تصرفات ويلاحظ من اهله انها عادي وعلى البنت حرام وبالتالي تتخزن في مخه هالفكرة ويطبقها اول ما يكبر. يشوف جارهم يدخن و مروق مع السيقاره ويخطط اذا كبر انه يجربها.. يشوف أمه في الماركت ( تطل ) في عربات التسوق للناس اللي ماتعرفهم، ويسوي زيها. يشوف أخته الكبيرة ترمي علبة العلك ويرمي وراها. يشوف الناس بالشارع وكيف تصرفاتها ويسوي زيهم حتى لو ما كان مقتنع! بس هي الحياة ماشية كذا ( وكل الناس تسوي كذا ).
أطفالنا وما في عقولهم هم نتاج تصرفاتنا ، اطفالنا واللي يفكرون فيه ويتصرفون على اساسه مسؤوليتنا. سواء كانوا اطفالك او اطفال غيرك. لازم نحسن من انفسنا لأقصى درجة حتى نتغير احنا وترجع تتمثل السلوكيات الصح في عيون الصغار، عشان نضمن ممارستها بأفضل شكل في المستقبل. حط في بالك تغييرك مو بس لاطفالك، تغييرك للأطفال الآخرين.. كل هالجيل الجديد مسؤوليتنا لو طلع زينا!! ضروري نتطور فكريا و سلوكيا وما ننتظر يد من برا تغيرنا ! ما ننتظر الحكومة ترفع رواتبنا ، ما ننتظر الحكومة تسن قوانين للتغيير، التغيير سنة الله في الكون لازم نستفيد منها ونوظفها لتغيير دواخلنا. بالتالي راح يتغير المحيط الصغير اللي حولنا، فالأكبر فالأكبر لمن نشوف المجتمع كله بدا عليه التغيير. كلنا نشتكي انو لو ربينا الطفل كويس وزرعنا فيه اشياء كويسة راح يطلع برا للمجتمع وفي المدرسة وفي كل مكان وراح يلاقي تصرفات خاطئة وهالمشكلة ناتجة من إنو ماحد يستشعر انه لمن يتغير بنفسه بيتغير حوله الكثير ! حط في بالك هالمشكلة حلها بيدنا بعد توفيق الله! اعزم على التغيير ودل غيرك، نبههم لنقاط ضعفنا وتأثيرها على أطفالنا، وان تغييره ما يكون في بيته بس وبرا لا ! لأن فيه أحد (برا البيت) راح يقتدي بهالسلوكية الخاطئة. ومتى ما اخلصنا هالنية لوجه الله متأكدة راح يحصل تغيير ومو بسيط!
من الحين نبدا نشيل أي مخلفات في الطريق، من الحين ننبه أي أحد يسقط مخلفاته عمدا أو سهواً، من الحين نسلم من جديد و ( صح ) . من الحين نشتري صحيح بخاري وصحيح مسلم ونعرف كيف كانت اخلاقيات الرسول. من الحين نحسن التعامل مع بناتنا و أولادنا وأمهاتنا وآبائنا، من الحين نربط حياتنا أكثر بالله، من الحين نتخلص من السلوكيات الخطأ، من الحين نبدا نترك أثر إيجابي في هالدنيا حتى بعد ما نموت. راح نموت واحنا خلفنا ورانا جيل ممتاز بنى الأرض ما هدمها، زرع الأرض ما أحرقها! جيل يعرف ما معنى ( خليفة الله في  أرضه ) .ومن الحين نعرف اننا بدينا نغير : )

ما نصنعه اليوم هو ما يصنع المستقبل

دائما يشدني البيز شكلا ومضمونا ً. وهو قطع من الأقمشة موصولة  بخيوط مع بعضها بطريقة فنية و ذوقية تساعد على مسك الأشياء الساخنة في المطبخ بالمقام الأول. جرت العاةد إنو يكون شكله: قطعة قماش ملونة أو مصحوبة بنقوش في الجهة الأمامية للبيز، وقطعة قماش سادة أو منقوشة برضو من الخلف. القطع هذي موصلة ببعضها بخيوط متينة ومرتبة. ويزين البيز بالقيطان على القطعة الأمامية غالبا كشكل جمالي متعارف عليه. ومن الداخل مبطنة بمزيد من الأقمشة لحفظ الحرارة. الشيء الحلو واللي يعجبني دائما هو الأطراف الخارجية للبيز :

زي ما نشوف عبار عن مثلثات تمت خياطتها في أطراف البيز للزينة. حتى صارت هالمثلثات هوية للبيز. البيز أقدر أعتبره قطعة فنية ورائها رؤية كبيرة ونظرة أعمق. البيز فن عمله أصحابه من غير مايعرفون إنو هذا الشيء فن ومتعة للناظر و المتذوق. النقوش و الأقمشة المختارة، الطرزات والألوان المنقتاة عشوائيا في البيز تشدني كثير. توليفات الأقمشة مع بعض سواء كانت منتقاة بعناية او بشكل عشوائي كلها تشدني، لمن أشوف البيز اللي قماشه من الأمام وردي ومن الخلف أزرق ، او من الأمام أحمر ومن الخلف بني بطريقة غريبة كلها ترجعني للماضي وبساطته .. للماضي اللي الاهتمام بالمظهر فيه أقل. ما ادري ليه أحس انو البيز من الأشياء اللي احتفظت بقيمتها على مر السنين واحتفظت بشكلها.. ما أحس إنو بيز إلا لمن يكون بهالشكل وبهالاختيار العشوائي وبخيوط القيطان. ما اشم فيه ريحة الماضي، ولا أشم فيه ريحة امرأة كبيرة في السن سهرت عليه تخيطه كتذكير للأيام الماضية وكـمصدر رزق، إلا لمن يوصلني بنفس الطريقة اللي ظهر فيها. و الأكيد: لمن يكون متطور أكثر ومعمول بعناية مصانع ما راح أحبه أو أطول اطالع فيه وأنسج منه ألف قصة وقصة. جاي على بالي أجلس مع وحدة تسويه بيدها واشوف كيف تبدا الحكاية وكيف تنتهي، أتخيل المثلثات تلخيص لحياة المرأة اللي عملته ! أتخيلها تمثل نقاط القوة والضعف، نقاط التحول في حياتها من اعلى لاسفل والعكس، نقاط المحبه والكره ، أشوف إنو تمثل المنعطفات اللي بحياتها وبحياتنا برضو! في البيز معاني كبيرة أكبر من عازل للحرارة. البيز يعلمني إنو الحياة مرات افضل تكون عشوائية ومو بتخطيط كبير ودقيق بس الأهم إننا ما نحيد عن الهدف الواضح اللي رسمناه لأنفسنا ( ويمثل هالشيء شكل البيز بالنهاية). البيز يقدم لي معنى بسيط جدا جدا للحياة: صلحها و جملها بنفسك وبأي طريقة تقدر عليها.

* عندنا ألف مساكة بأشكال جميلة وألوان روعة في المطبخ ، بس فعليا ونفسيا ما أقدر أستخدم إلا البيز.