طـيري ، والـسما بلادك

نعم إنها الحقيقة! الحقيقة و ليست الخيال .. نعم صدق ما تراه نوال تنزل طبخة اخرى في بلوقها . أنا مقدرة ان فيه كثير راح ينهارون على الطبخة وعلى سناعتي، وما اقدر اقول لهم شيء لأن معاهم حق صراحة ! بس عزائي الوحيد لهؤلاء انو : لا تيأس يوما ما ستتذوق طبخي وستنهار أكثر

اضغط الصورة للتكبير والانشكاح

نعممممممم هذه الصورة ليست بخيال! هذه الطبخة التي ستجعلك منسدحاً تستطيع عملها عزيزي رب المنزل هكذا:

المقادير:
كيس خبز توست ( هرفي ) واللي بيسوي لوزين بزعل منه!
صدور دجاج بدون عظم.
كريمة الخفق ( المراعي ) <—تحسون لها اسهم ؟.
قشطة ( اي شي ماعندي مشكلة بس يفضل التاج ).
جبن موزاريلا ( المراعي ) أو جبن كرافت مبشور.
بصل – فلفل رومي ( ملون والا بزعل منكم ) – بهارات – بقدونس – نعناع
صينية – ملعقة خشبية للتحريك – سكينة للتقطيع – فرن – قدر للكريمة وقدر للدجاج <—فيه إخلاص اكثر من كذا ؟

الطريقة:

اضغط الصورة للتكبير والانشكاح

أولا: نسلق الدجاج مع البهارات والفلفل الرومي عشان يصير طعمه جميل جدن. بعدين نقطع البصل والفلفل الرومي ( الملون ) شرائح طويلة ونحطها بتيفال مع بقدونس ونعناع ، ونحط شووية زيت بس عشان الكشنة. بعد سلق الدجاج نقوم بتنتيفه عشان يتأدب ونحطه في التيفال مع اصدقائه البصل والفلفل والنعناع و البقدونس و الزيت ، نضيف عليهم بهارات مثل: مسمنة –  فلفل اسود …الخ. <—ترا توهقت ما تعرف وش باقي البهارات.
نحركهم عشان يندمجون سوا ويحبون بعض ونسكر عليهم بالغطا ونحطهم على النار .

بينما الاصدقاء على النار ، ناخذ التوست ( هرفي وش قلنااااااا؟ ) ونشيل اطرافه ونرص طبقتين فوق بعض من التوست في الصينية. واللي حاب يدهنها بمايونيز يدهن ليه لا ! انا ديموقراطية ، بعدين خليكم زيي وروحوا سووا سلطة انا سويت سلطة الزبادي بالخيار.

بعد ما يخلص الدجاج والبصل من على النار وتحسون انهم تكشنوا كويس نطفي النار ونحط الدجاج المكشن مع البصل فوق التوست ونحاول نخلي شكله مرتب.  بعدين يجي هنا دور القشطة وكريمة الخفق <—اصدقائي دائمن وأبدن | | علبة قشطة مقابل علية صغيرة من كريمة الخفق ( اصغر مقاس ) نخلطهم وبعدين نحميهم على النار لمن يفور الخليط ، ناخذ الخليط ونصبه فوق طبقة الدجاج:

اضغط الصورة للتكبير والانشكاح

الكريمة راح تتماسك مع الدجاج ويتشربه المدري ايش وبينزل شوي منه ع الخبز تحت وهذا قمة اللذة، بعدين نحط فوقه اخر شيء حبن موزاريلا او جبن كرافت مبشور. ندخلهم الفرن لمن تذوب الجبنة وتتحمر شوي :

اضغط الصورة للتكبير والانشكاح

تقدم مع البطاطس المقلية كما عملت حفظني الله، وبالهناء والعافية . تستطيعين أن تذلين أهلك فيها وكل شوي تقولين يوم سويت هذيك الطبخة ! تذكرين قبل ما اسوي هذيك الطبخة ، تستطيعين ان تتمسكني عند امك بعد عمل الطبخة وتقولين أبي أروح لكذا وكذا ستلاحظين أن امك ستسمح لك مباشرة، وحتى تظمني رضاها عن الطلعة قولي بمر على هايبر بندا وبجيب طلبات الطبخة حقت بكرا خخخخخخخخخ سترين الانشكاح التام

الطبخة اهداء لكل اللي يحبوني شكرا لكم لولا الله ثم انتم ما وصلت لهالمستوى والنجاح الباهر في الطبخ و حبيت أبشركم بقرب صدور كتابي في الطبخ والاهداء لكم طبعا .

ما العيد ؟

العيد كله كلمة واحدة لا أكثر لكنه يتمدد ليشمل أكثر من معنى عميق، بل أكثرها عمقا ً ، العيد فرحة وتكريم من ربنا الكريم لنا، العيد هدية من الله . العيد في ابتسامة طفل ، العيد في حلويات يتسابق عليها الصغار و الكبار .. العيد زينة و جمال ، العيد لبس جميل ومتواضع ، العيد رائحة زكية و نظافة. العيد مائدة لا ننسى منها الفقراء ونطعمهم زكاة الفطر ، العيد أن نقتدي بسنة نبينا ونفطر على تمرات كما فعل صلى الله عليه وسلم . العيد تكبيرات وصلاة وخطبة وناس كثيرة في المسجد ملتمّة لتفرح لا لتحزن أو تشجب. العيد تهنئة من أخ أو اتصال من صديق أو رسالة من بعيد . العيد ذكريات نوثقها للأيام والأزمان القادمة . العيد فرصة للنقاء و إعادة الروابط البشرية . فرصتي وفرصة الجميع أن نغفر وننسى الإساءة ونبدأ بالمباركة والتهنئة . العيد في جيوب الأطفال الممتلئة بالعيديات . العيد حب حل علينا جميعا فـ لنحبّـه .

كل سنة وانتم طيبين وبصحة و سلامة، وهالعيد وكل عيد وكل يوم يارب واحنا جميعا نتغير للأحسن ونعيش في سعادة داخلية عمييييقة.
يصلح أقول : أحبــكـــــــم ؟

الحمد لله كثير إني قريت هالكتاب.. ما أبالغ لو أقول حسيت إني أسلمت من جديد. قرأته وما كان في بالي إن ردة فعلي بتكون زي كذا أبدا أبدا أبدا .. بس العجيب من اول مابديت أقراه و أنا تغيرت.. حسيت بعار وفشل لأني فوق العشرين سنة مسلمة وفي بيئة مسلمة وما عمري فكرت تجاه الآيات زي ما فكّر جيفري. بس بالنهاية الحمد لله اللي ربي يسر لي أقرأ هذا الكتاب.. طول الـ 400 صفحة و أنا أقرأ و أفكر في نفس الوقت.. أسكر الكتاب واكتب ملاحظاتي الخاصة عن كل شيء تكلم عنه أو آية أوردها. عرفت اشياء كثيرة وتوضحت لي اشياء أكثر ، زالت شكوك وتوسعت مداركي نحو فهم القرآن أكثر. أحسه داخل جواتي وعارف ان العقل أساس ضروري للإيمان وأنو تعطيل العقول يخالف فطرتنا البشرية ويخالف مبدأ استخلافنا في الأرض. نفسي أعطي الكتاب يقرأه كل شخص سلم بالأمور اللي نُقلت له بدون تفكير والمصيبة أنه يروج لها بدون اقتناع او حتى بون ما يشيك على عقله هل هو مقتنع عن عقل وقلب او مقتنع لأنه هذا الموروث بس ؟ عني ! أعتبر هذا الكتاب من أفضل الكتب اللي قرأتها وبقرأها .. بالنسبة لي أفضل من كتب المواعظ والخطب لأننا بصراحة شبه تشبعنا من هالطريقة في الوعظ لدرجة صارت ما عاد تأثر فينا .. بس الكتب اللي تخاطب عقلك وتنميه وتدعم كل أفكارك وأسئلتك وتحثك على التفكر والتأمل والسؤال هذي الكتب اللي محتاجينها عشان نعرف غايتنا في الحياة ، وعشان نتغير للأفضل.

في الجزء الأول من الكتاب يتكلم جيفري عن رحلته مع القرآن باختصار تقريبا. هذا الجزء الساحر من الكتاب واللي يخليك تعيش في عالم ( مليان غيوم ) ، عالم باختصار : روحاني. هذا الجزء يحرضك على التفكير والسؤال ، يحرضك على أنو تبحث عن أجوبة مستترة في أشياء ما كنا نعطيها اهتمام. يحرضك إنك تبدأ من جديد حياتك.

الجزء الثاني بدأ يتكلم عن مشاكل وهموم المسلمين في أمريكا، المشاكل اللي تكونت من تعصب أهل الجاليات المسلمين المهاجرين الوارثين للإسلام ومع هالتعصب وانفتاح الحياة في أمريكا نشأ فجوة كبيرة بين مسلمي الجيل الثاني – الشباب – والثالث والمسجد. تكلم عن سياسة القمع لبعض شيوخ الجاليات وعن معاناة المسلمات خصوصا وتعامل الرجال معاهم في الجالية. أمور كثيرة تحدث عنها في هذا الجزء خلتني أُصاب بإحباط !!! ودي أقول له هذي المشاكل مو بس في أمريكا .. المشاكل هذي عندنا ومليانة وهي أساس مشكلتنا الحين. التهميش للعقل وفرض الافكار الموروثة بدون مناقشتها!

هذا الكتاب كنز. متأكدة راح يغير فيكم شيء كثييير وما راح اقول شيء بسيط لاني متيقنة ان التغيير بيكون كبير جدا.. وان شاء الله إيجابي .. فرصة برضو للي تعودوا نمط واحد من التفكير في الدين انهم يطلعون على الكتاب، ويحاولون يقراونه بروح التقبل ، أكيد راح يفتح لكم ابواب جميلة .

الكتاب من تأليف جيفري لانغ. ترجمة: ابراهيم يحيى الشهابي.
الناشر: دار الفكر. موجود في مكتبة جرير بسعر 37 ريال.
407 صفحات بما فيها كلمة للناشر ومقدمة من المترجم ومقدمة للمؤلف وفصلين بعنوان:
1- ضياع ديني.
2- أين ذهب الأبناء كلهم.

في الجزء الثاني من الكتاب لي (بعض) التحفظات على بعض ما ذكره في الكتاب. والتحفظات ترجع إلى اختلاف الثقافة لا أكثر . يعني ممكن تكون مني بس.

- شيء شدني في هذا الانسان (جيفري) غير عقله وتفكيره، اللي هو قدرته الفظيعة على التحاور بأدب وهدوء. وهالشيء يظهر مع رسائل الناس اللي تسأله او حتى تشكك في القرآن . ويظهر بشكل أكبر في حواراته مع بنته بخصوص دينها واسئلتها الجريئة. فعلا إنسان معطي العقل اللي ميزنا فيه الله قيمته.

- حاولت أنقل لكم بعض من الأشياء اللي أعجبتني في الكتاب ، لاحظت إنو في النهاية بنقل كل شيء بس اكتفيت بعدد بسيط من الاقتباسات:

انشكحت ضحك في المقطع هذا كل الناس لمن أسأل أو ينحصرون في زاوية ضيقة من النقاش يقولون إنتي تقرين كتب فلسفة وأنا في الواقع ما اقرأ والله :

* إذا ما قرأت الكتاب لسا فـ : من جد لايفوتك اليوم قبل بكرا.
* الجميع في توتر وفيس بوك اللي طلبوا رأيي في الكتاب والجميلين اللي انتظروا الريفيو، هذا البوست إهداء لكم، وكل شخص يبحث عن كتاب يغير حياته ولكل شخص يبحث عن الحقيقة و يـُقمع

الحياة تمنحنا الكثير من التجارب , وتضع في بعضنا القدرة على قول الأشياء التي تصيبنا في مقتل , بنينا هذا المكان لكم , طليناه بالألوان , نثرنا الورود في جانب وعلقنا الستائر في الآخر, اعتنينا بتفاصيله وحرصنا على أن يكون مريحاً ,

قناعاتنا تقول إن البداية أهم خطوة ، و التطوير جاي. قدمنا البداية بكل اللي نقدر عليه في الظروف الصعبة والوقت الضيق، لكن الهدف هو انو يكون فيه مكان يضم اجمل اللي نقرأه ونشارك فيه غيرنا .. من يعرف يمكن نلفت نظر احد لكتاب ويكون هالكتاب نقطة التغيير في حياته ؟ من يعرف يمكن يكون هالموقع سبب في إقبال الناس على القراءة ؟ محد يعرف بس اللي أعرفه إنو هالموقع ما راح يتطور لو مهما ايش سوينا من ديزاين واكواد الا لمن تكونون انتم موجودين تلخصون للجميع قراءاتكم وتعطون اللي يقرا اجمل اختياراتكم لاجمل الكتب اللي تستحق القراءة . ندين للي حولنا بمشاريع انتاجية ومثمرة ، ندين للمحتوى العربي في النت بإثراءه عشان كذا بدينا رغم المشاكل والاخطاء .. بدينا وثبتنا اول خطوة رغم انو فيه اشياء تحتاج مراجعة وتطوير .. بس يشهد الله ان الهدف خالص وما وراه اي مطامع .. هدفنا نوصل كلام جميل مافيه اي حرام او تعدي على اي شي يمس الله او الرسول او الدين. هدفنا اننا نعطي القراء وغير القراء مكان مفيد جدا بدون دوخة المنتديات و وجع راسها ! هدفنا اننا نثري المحتوى العربي اللي أقدر أقول عنه هزيل . ومايهمني لو غيره ألف موقع ونفس التوجه . والله العظيم ما يهمني ويمكن يهمني ينجحون أكثر لأن هدفنا ابد مو ربحي هدفنا هو انتم ، هدفنا نخدمكم ونثريكم .. بنعدل الأخطاء في الموقع ونحسن ونطور وبنعتمد في كل هذا على اقتراحاتكم وارائكم .. نسخة تجريبة وان شاء الله ما تكون الأخيرة .. النسخ الجاية راح تكون قد مانقدر خالية من الاخطاء . شكرا

* شكرا مشاعل والله على الكلام الجميل! مقدر اتخيل كلام يوصف الموقع اجمل من كذا
* شكرا صديقتي الصدوقة يمان على الخط الجميل و الفزعة الأجمل . صارت الدعوة مغرية اكثر بخطك
* شكرا لـ http://twitter.com/isuliman

بعد صلاة الفجر كنت أسمع سورة الإسراء بصوت ماهر العقيلي. صوته ساحر.. ساعدني أتدبر الآيات وأحس بها حرف حرف وكلمة كلمة ، معنى معنى .. كل هالمعاني تترجم دموع وقشعريرة بالجسم . هالشعور الفظيع اللي حسيته ما أقدر ما أشاركه معاكم. أبيكم تبدون فيها يومكم أو تنهونه في سماع هالآيات. أو حتى بوسط اليوم بعد أي خبر يفرح أو يحزن .. لكل الأوقات .. بس هااااه ادعوا لي ، اتفقنا ؟

http://www.mediafire.com/?ro03y3myuxn