طـيري ، والـسما بلادك

canon EOS 400D. – ISO 400/5.6/1/50sec
ماشاء الله تبارك الله

السلام عليكم..
رشا تقول إني هالفترة متغيرة جداً لاني صرت أرد على التلفون على طول
لدرجة إني أول ما أقول : ألو ، أحس رشا تتنح شوي ، بعدين فكرت حسيت كلامها صدق يعني ألواني في الصور لاحظت إنها متغيرة خخخخخخ ألوان بلوقي مدري كيف تجرأت على لون فاتح ومشرق كذا ؟ بعدين دايمن عروب تقول لي أشياء انه مب إنتي مثلا ماحسيتك بهالشيء هل هي ياترى فترة جديدة في حياة نوال ؟ <—لايكثر .
والحين اللي أكد لي التغير إني قاعدة أنزل طريقة حلى …..!! ستين علامة تعجب ماقد تخيلت أبد إني بتكلم في شؤون المطبخ وأنافس photon .. ببساطة لأني من عداد الفاشلين والفاشلات فيه.
عروب لاتناظرين وتقولين : طه طه طه ! اعترفي ان نص طبخاتك اللي تسوينها في الغدا مني ؟

أعزائي القراء أقدم لكم الحلا الذي شكله هكذا:

ويقال والله أعلم إنو اسمه السنمون الكذّاب، مع إني ما احب الكذب بس الظروف..

المقادير :

* كب كيك cup cake لوزين.. لحد يجيب شيء غير لوزين رجاءن ( يكون جواته تشاكلت او توفي حسب الرغبة ) .

مقادير الخلطة الأولى:
* ملعقة كبيرة حليب بودرة.
* ملعقة كبيرة قرفة.
* ملعقة كبيرة نسكافيه.
* نص ملعقة كبيرة سكر.
* بيالة موية.
* نص بيالة زيت.
* بيضة واحدة.

مقادير الخلطة الثانية:
* 6 حبات جبن كيري.
* علبة حليب نستلى كبير.

#تخلطون مقادير الخلطة الأولى في الخلاط بعدين تنحط في قدر على نار هادئة بعدين نحرك نحرك لمن يصير الخليط ثخين شوي بس أهم شيء مايتكتل لو يتكتل ما اعرفكم والوجه من الوجه أبيض بس أختي تقول لو تكتل خل يحركونه بملعقة البيض اللي صايرة كذا كذا كذا أسلاك .
بعدين نصب بمقدار ملعقة كبيرة تقريبا على كل كب كيك من هالخليط..، بعين ندخلهم الفرن عشان تنشف الخلطة وتتشربها الكيكة شوي.

نطلع الكب كيكات من الفرن ونضيف لكل كيكة مقدار ملعقة كبيرة من الخليط الثاني بعد خلطة في الخلاط برضو ..
بعدين نرجع ندخلها الفرن مرة ثانية لمدة خمس دقائق .. بعد مانطلعها من الفرن نحط فوقها لوز مبشور محمص ( يتحمص بقليل من الزيت على النار ) + عين الجمل ( من أي محمصة ).
بعدين نحط هيرشي شيرا ( تشاكلت + توفي ) .. أخر شيء ندخلها الثلاجة بعدين تقدم مع القهوة ..

[youtube:http://www.youtube.com/watch?v=V4rUulQT_88]
مجرد هيئة إضافية في البلد وظيفتها تتلخص بالضبط في كلمتين : زي قلتها.
كل دول العالم لو فيه عواصف رملية أو اي أجواء سيئة تخبر المواطنين قبل باتخاذ الاحتياطات وتوقيف الدوامات حفاظا على سلامتهم..
بس احنا مب لازم ناخذ احتياطاتنا بالطقاق اللي يطقنا كشعب.. يمكن لو نموت نخفف على ميزانية الدولة .. الاطفال احتجزوا بالمدارس الا اذا كانت المديرة والمدير تصرفوا بسرعة وطلعوهم مع اني للحين ماسمعت شيء زي كذا..
اختي بالمدرسة تقول 29 حالة اغماء بس بين البنات ناس من الروعة وناس من الكتمة.. وهيئة الارصاد وحماية البيئة قاعدين يصورون مع بعض
ابي افهم بس ليش التهميش لنا كـ أرواح حية في وطن نعيش فيه ؟
من حقنا نعرف احوال الطقس ومن حقنا نمتنع عن الدوام حفاظا على حياتنا وحياة الآخرين .. مايحتاج اقول حجم الحوادث اللي صارت ولا حجم الخوف اللي عشناه عشان يوصلون اهلنا سالمين بس ..
المبالغ المالية اللي تنصرف في هيئات زي كذا والأجهزة الحديثة الي تستورد مو موجودة لهذا الغرض ؟
ياوطني سؤال: احنا نستحق منك هذا ؟

* استغفر الله استغفر الله استغفر الله.. يارب ابعد عنا هالجو يارب حوله لمطر
يارب احنا مذنبين يارب سامحنا واغفر لنا وارحمنا ..

” - أحبك ونصف، أحبك وثلاثة أرباع، أحبك الا خمس، أنا 24 أحبك. أحبك صباح السبت، أحبك ظهر الاثنين، أحبك مساء الخميس، أنا جمعةً أحبك. أحبك في اليوم الثاني، أحبك في الخامس عشر، أنا 29 أو 30 أحبك. أحبك طفولة، أحبك مراهقة. أحبك شيخوخة. أنا عُمراً أحبك “

النص لـ : *

بيجي يوم يا روحي وبتعرفين ياجود إنك أغلى شيء بحياتي.. إنك أجمل طفلة و أجمل شيء في قلبي ، بيجي يوم بتكبرين ان شاء الله وتعرفين إني حبيتك أكثر من بنتي اللي أتخيلها..بيجي يوم وتصيرين كبيرة وتعرفين إنك الهوا اللي أتنفسه كل ويك إند.. بيجي يوم إن شاء الله وتقرين هالكلام وتصيرين تفهمينه.. وتفهمين مكانك بقلبي وبقلب أمك وبقلب جدتك وجدكوحتى خالك الوحيد اللي يشوفك زي بنته حصوص الصغيرة ويمكن أكثر والله.. أبي تكبرين وتعرفين إنو إنتي كنتي الوحيدة اللي تخليني أضحك حتى لو الدنيا فيني ضايقة.
أحبك كل لحظة معاك وكل كلمة تكون معاك شيء يجنن.. أحس بشيء غير مره وأنا أحظنك كل ربع ساعة..
تدرين ياعمري ايش اللي أحبه أكثر شيء فيك ؟ إنو ما تتمللين لمن أحظنك.. تظلين تحظنيني بنفس القدر اللي أحبك فيه..أحبك وأحب غرورك لمن أقولك مين عنده أحسن عيون؟ تقولين جود وبضحكة غرور.. ولمن اقولك مين عنده أحلى فم؟ بنفس النظرة والضحكة تقولين جود.. تبين الصدق؟ أنا أشوفك صادقة مره.. إنتي أحلى عيون وأحلى فم واحلى فم وأحلى روح وأحى بنت وأحلى كل شيء.. يكفيني أراقبك وأشوفك تلعبين وتسولفين.. وتغيرين ملابس عروساتك.. هالمواقف بس تكفيني أعيش بابتسامة لـ 5 سنين قدام..
جود ياروح خالتك إنتي جوا قلبي والله. يارب تخليك لنا وتحفظك ولا تورينا فيك مكروه..

* ماشاء الله تبارك الله / canon EOS 400D