طـيري ، والـسما بلادك

*

كل عيد يمر بكم وانتم اجمل ،
كل فرحة بالعيد والألوان تملأ عالمكم الصغير.
كل سنة وأحلامكم أقرب للتحقق
لكل اللي مروا / كل سنة وأنا اشوفكم بفرح دايمن .
أحبكم والله

* محد يقدر يقاوم فرحة الأطفال لمن يستلمون هدايا ولو كانت بسيطة للعيد، راح يحسون بالعيد من قلب، ويفرحون بكل إحساسهم ويعيشون العيد بالفرحة المطلوبة
مرات أحس أنهم اخذو الفرح بدالنا .. يعني احنا مانفرح كثرهم .. بملابسهم بانتظارهم للبس العيد ومتى يطل الصبح عشان بس يشوفون انفسهم بملابس جديدة.

من لمن انولدت جود وصارت هدايا العيد باسمها ، ما اتخيل كيف هالبنت الصغيرة غيرت حاجات كثيرة في حياتنا، مقدر اتخيل اي شي بدون ما أذكرها فيه.
المهم بكل عيد صرت اعمل هدايا باسمها ونعطيها الصغار ويكفي نشوف فرحتهم ، ويكفي لمن تكبر جود تشوف كيف صنعت فرح ناس كثير بدون ما تدري .. : )

حبيت اعرض هدايا العيد اللي راح ، لانها كانت الأبسط والأقرب لقلبي وقلب الأطفال
بكل عيد كنا نجيب من محلات وكانت الفخامة بالشوكولا والهدية تفقدها البساطة بصراحة
فقررت اسويها بنفسي واضبطها بنفسي ، مهما كان شغل اليد غير مره وبساطة الشوكولا أجمل ..

الهدايا عبارة اغراض متوفرة بكل بيت وتوفيها سهل ومو صعب ومو غالي أبداً..

- أكواب بلاستيكية
- ورق كروشيه ، وفيه ورق راح تشوفونه بالصور ما اعرف شسمه لكنه متوفر بالمكتبات.
- سلك حديدي مغطى بفرو ترا ما ادري شسمه بس موجود في مكتبة الشرق وراح تعرفونه من الصور.
- بخاخات ملونة
- أي أشكال تحبونها للزينه.
- صمغ ومقص.

* بداية نبخ الكاسات من جوا بأي لون نحب ، عشان تكون من جوا مولنة وتكسر لون البياض وخصوصا الأطفال يحبون الملون
بعدين نبدأ نقص من الورق (أي لون) بشكل طولي ونلفه حوالين الكاسة لمن تتغطى كلها
( أنا أحب اغطي اللي فوق قبل بعدين اقض قصة ثانية للي تحت ).
ناخذ السيم ونقصه للطول اللي نبيه ، لأنه راح يكون هو الحامل للكأس فقدروا الطول اللي ترتاحون له ، اهم شي ما يكون صغير مره عشان ينشال بالراحة وما يتعبكم وانتو تحطون الشوكولا فيه، ولا يكون طويل كثير لأانه راح يكون سهل مره انه ينفك ..
بعد قصه نثبت أول طرف منه على الكاسة من فوق ولمن تتثبت مضبوط نلويه ونثبت الطرف الثاني ونتأكد انه تثبت مع الصمغ كويس..
بعدين نزين الكاسة باللي نبي ، إما قلوب او ستكرات او قلترز او اي حاجة .. وانا انصح بمكتبة الشرق أو جرير فيها حاجات مره حلوة وتفتح النفس.
بعد ما ننتهي من التضبيط نعبي الكاسات بالحلويات والألعاب الصغيرة اللي يحبوا الأطفال.

* في الصور أعلاه شكل الأكوب من بداية التزيين لحد اكتماله.
* اضغط على الصور للتكبير

فخورة وياكبر فخري فيك يابلدي وياكبر فخري بنفسي و الناس..
فخورة لأن مامثلك بهالدنيا بلد ولا شعب ولا ناس ..
فخورة لأن الناس كل واحد بحاله ماحد ياكل في عرض الثاني ولاحد يشغل نفسه بالناس وايش عندهم
فخورة لأن الناس ما تحش في بعض ولا تحسد بعضها البعض ، ولأن مجالس الحريم شييي يونننننس
ما يحشون فيك ومن وراك ، ما يقولن عن فلانة مسكينة ما تزوجت ماحملت ، مايقولون فلانة تصرف على بيتها من فلوسها
رجلها ما يعطيها فلوس ، يا الله على جلسات الحريم النقية ، يا الله تحسسني اني وسخة واني صغيرة قدام كبرهم وكبر اخلاقهم
يعني يعني للأمانة لا أكثر لمن تجي وحدة ما يقابلنا بفيس ولمن تروح ينقلب الفيس ويبدأ مسلسل الحش ..
فخورة لأن مجتمعنا ما يحب يقلد بعضه ، فلان غير سيارته وش ناقصني انا بغير , الفلان غيروا اثاث بيتهم واحنا ليش ما نغير
فخورة بتطور المستوى الفكري في البلد، فخورة بانو كل واحد قاعد يستعمل عقله اللي انعمه الله عليه
وش كثر انا فخورة بالوضع الاجتماعي اللي نعيشه ، فخورة لأن الولد يعلق مسألة شراكة حياته بيد امه واخته ، وهو زي الدجاجة اذا وافقوا امه واخته
وافق ، طبعا هو دجاجة شلون يعني بيختار من نفسه … الدجاجة مالها رأي لو سمحتوا !! انتبهوا !
وش كثر انا فخورة بالبنت اللي أقصى تفكيرها وابعده تتزوج عشان الناس .. عشان ما يكلون فيها .. تقبل بأي أحد ، او تقبل بواحد كووشخة وبعدين يا ارض اهتزي ماحدا قدي ، انا تزوجت مب كلمتن يتزوج هالأيام ..
يا الله ع الفخر اللي أحسه لمن أطلع من البيت وأشوف الناس والتزامها بالانظة والاشارات والطوابير واحترامهم للنظافة وعدم البصق في الأماكن العامة .
يااا إلهي شو بفتخر في هالوطن اللي فيه ناس حافظة طريقها صم وهو نفس الطريق اللي مشوه قبل، يمين يسار لا ، والتزم مكانك وبلا قلة ادب من قالك تروح يمين يسار.. طريق واحد مشوه غيرنا لازم نمشيه احنا ، ليش كيف ؟ لاتسألوا عن اشياء ان تبد لكم تسؤكم ، ترا شوي وتصيرين كافرة وخارجة عن الملة يانوال ..
فخورة لمن اعرف ان بلدنا اكبر دولة تملك احتياطي بترول واكبر دولة تصدر البترول ، ولمن افتح النشرات الاقتصادية واشوف سعر البرميل طاااق و واصل لـ 120 دولار .. بس الرواتب شحيحة ، زهيدة ، ولايكثر يا شعب !
افتخر مررره لمن اِشوف المتعلم كأنه ماتعلم ، والتخلف معشش فيه تعشش .. نسأل الله السلامة ،
أفتخر وبشدة لأن الشباب السعودي اذا راحوا للابتعاث ما يظهرون الجانب السيء منا.. يروحون وكلهم احترام بسم الله عليهم، يعني ابد ما يحسس العالم انه ميت في الجنس والخرابيط والبنات .. يروح يلعب يلعب ويرجع وبعدها يتزوج احسن البنات باسم انه ولد وناقل عيبه ..
ايوا ياشاب ياسعودي ممتاز هذا اللي احنا نسعى له ، نسعى اننا نوري العالم وش هم المسلمين عشان ما يتعبون اننفسهم ويحيكون لنا المؤامرات
ويسوون شعار جيان عشان البنت تنزع الحجاب من رأسها،
فخورة لأن البنات بالجامعة يمسكون القران ويحفظونه تأدية واجب واذا سكرت القرآن وخلصت حافظة الثمن اللي لازم يتسمع اليوم
جلست تاكل عساه اكل الهنا والعافية ، بس لحظة اذا اكلت رمت الاكل الباقي في السيب او قامت وانكب العصير او المشروب الغازي . واتوسخت الارض
وصار فيه سبب سخييييف للعاملة المسكينة انها تتعب وينحني ظهرها ، تخيلوا سبب تافه زي كذا غرب وحدة عن اهلها واولادها
بسبب وحدة تتصرف تصرف سخيف وترمي الاشياء وراها كأنها بيبي عمرها سنتين وتحتاج من ينظف وراها .. سبب تافه من وحدة النظافة بالنسبة لها شيء ثانوي ، لا لا لا شيء تافة !
فخورة لأني لمن اطلع اخر الدوام اشوف المسخرة والمزبلة اللي بعد البنات ، وافتخر بعد لمن اجلس على كرسي والاقي فيه علك ! او الاقي تحت الطاولة علك ملصق بكل وساخة ..فخورة وياااااااا للفخر ان جامعاتنا في مصاف الجامعات الكبيرة والدولي ، والسبب في تقدمنا هالشلل الجميلة
يا الله محد يتصور وش قد افتخر لمن امر من مكتب التوعية والارشاد اللطيفييين جدا وهم يفتشون الجوالات او حابسين بنت عشان كم قصير
يخافون على البنت يصكها هوا يابعد عمري هم بس..
كلي فخر لان العقول مؤجرة لمن لا نعلمه، افتخر لأن محد يبي يقرا او يتفقه في دينه وينتظر فتوى قد تكون صح او غلط من اي شيخ
فخورة لأني لمن اجلس اتابع برنامج فتاوى اطلع بحصيلة عملية واااااااو عن حكم التشقير وعيد الحب وعن انو فلانة حجت ونست مدري وش تسوي
وياشييييييييييخ هل علي شيء ؟ طبعا هي تسأل هالسؤال المسكينة لأن مافيه كتب ولامجلدات ولا فتواى سابقة عن احكام الحج
والا اكثر شي احس بفخر تجاهه لمن تتصل وحدة وتقول ياشيخ جامعني زوجي في نهار رمضان .. يحق لها تتصل وتقول هالشيء عند كل خلق الله
الحكم غااااااامض مرررررررررررررره ومحد يعرف الا اللي متبصر بالدين ولدرجة عظيمة ! هي مسكينة كيف تعرف ؟
افتخر لأن الطبقة الوسطى بدت تختفي :| وتتحول لطبق كادحة ويصير فيه فجوة عنيفة بالمجتمع فقراء – اغنياء – بربري – الهرم ..
ونصير زي السينما البنت تحب واحد فقير ومسكين ياحرااام ، بس هي غنية وابوها غني .. وش السواة يا احمممااااد ؟
يغمرني الفخر لأن اموال طائلة تصرف على الفاشلين امثال المنتخب السعودي الفاشل اللي يروح يفشل نفسه ويرجع ..
فخورة لأننا متميزن بكل حاجة ماشاء الله علينا ، يعني مدري وش اقول بس بهالنقطة ، السعوديين تعرفهم على بعد خمس كيلو متر اذا رحت لأي مكان
لا لا واللي يحسسك بفخر اكثر ان فيه مبالغ طائلة تنصرف من الدولة لمشاريع مهمة والمسؤولين الصغار او نص كبار يلطشون نص المبالغ
والمالية يا حرام تحسب ان الفلوس راحت للمشروع بينما الفلوس تتمل في شنط ماركة واكسسوارات ديور بمدري كم رياااللز وااااو لووولز للبنت الجميلة حقتهم ، او تصرف في شوارع فرنسا والترزز في مقاهي السوليدير ، عشان تنخطب البنت ياحرااام ، وعشان الام الجميلة تجي تهذري باستراحات الحريم
احنا صيفنا في فرنسا ، بينما هالمبالغ قادرة تعيش عشرات من العوائل كل الدهر ، بينما هالفلوس تقدر تساعد في امراض الناس اللي كل يوم يبون مساعدة في الجريدة ، بس لا ! وألف لا .. احنا نقدم اللي عندنا للناس اللي برا ، في لبنان مثلا .. لبنان لازم نأثرهم على انفسنا وشعبنا لازم يموت جوع ، بس لبنان لا بسم الله عليهم ,, لازم يصرف لهم كم مليون .. ياااااااااي تؤبرني السعودية ..
افتخر لأن الناس عندها حدود مقدسة وهي ما تدري وش الطبخة ، لا تنتقدين فتوى لا تمحدين امريكا تراك خارجة عن الملة !
خير انتي وش تبين ؟ لازم تصيرين زي العالم وتاخذين الشيء من دون تفكير .. يعني يبون يسوون فريزنق للاسلام
مع ان الاسلام صالح لكل زمان وكل مكان ، وسمح ومطااااط في تعاليمه ،، انا اقصد الاشياء اللي لازم تتغير مع تغير الزمن
ما اقصد الخطوط العريضة اللي مكتوبة في القرآن هذي مافيها نقاش ..

كل سنة وانتم احسن شعب ياكويسسييين ياكباااااااار

أمس كنت أقرأ: الجسد حقيبة سفر – غادة السمان ,
شدني مقطع ( ولا هو الوحيد اللي شدني، ولو بتكلم حرفيا بقول الكتاب كله شدني) ، كانت غادة تقول فيه :

كل رحيل يقود إلى الوطن،مادام الوطن يسكننا، كل الطائرات تهبط بي في أرض الوطن

غبطتها .. : ) ما اعرف الشعور اللي حسيته إلا إنو غبطة ، غبطتها لأنو عندها هالشعور لوطنها
اللي بنفس الوقت أنا ما أحسه .. ما أحس الطيارات كلها راح تهبط في وطني المسجل في أوراقي الرسمية ولو هبطت رغما عني. كل رحيل يقود لغير الوطن .. حقيقة غبطتها لإحساسها بالوطن في المكان ، لمن تحكي عن ايام بيروت ومدن سورية ..
كان للمكان تأثير في نفسها وفي حياتها ..

مالي وطن بالمكان ، وطني يكمن فيني وفي داخلي، وانا من الداخل مملوؤة بصديقاتي
انا صديقاتي هم وطني ، لمن أحملهم معاي بكل دقيقة وبكل ثانية وبكل ظرف، وبكل بسمة وكل دمعة ، اعرف تماما انهم وطني ..
احس إني أشيلهم معاي دايمن ، زي الإنسان لمن يحمل وطنه وذكرياته فيه،
في شنطتي ، في دفتر محاضراتي ، في أغراض الكولاج ، في عدسة الكاميرا، في فولدر الأفلام،في فولدرات الواجبات والبرامج ، في يدي ، بين دولاب ملابسي ، في واجهة بيتنا .. في واجهة كل شي سعيد وحزين .. في كل الأشياء .. وكل الظروف أشيلكم ..
المكان والاشخاص الوحيدين اللي احط عندهم ( اولا – آخرا ) ومعاي كل حقائبي المليانة كلام .. المليانة من كل شيء
وقتها بس اعرف ان انتمائي ماينتمي لمكان ، انتمائي لمجموعة صغيرة صنعتني وانا صنعتها ..
لمن اكون بالمحاضرة ومعاي بالقاعة اكثر من 20 بنت ، كلهم حولي وقراب (مكانيا) مني ، بس افكر بريم
افكر بمحاضرتها ؟! افكر لمن تطلع من البيت وتشيل الوانها ولوحها .. لمن تحاكي البنات .. احس اني اداوم معاها..
لمن اجلس مع بنات ، أي بنات وانا افكر بهادية واقول الحين الساعة عندهم كذا وكذا ، اكيد هادية تسوي كذا
اكيد هادية تناقش الدكتور بالمحاضرة .. لمن فجأة أرسل مسج لنور ، اتخيلها نايمة – قومها المسج ، عصبت سرقت منها احلى نومة وأحلى احلام .
بس قرت المسج انبسطت .. وابتسمت .. لمن أكون أدرس وأفكر : نور أكيد ترتب غرفتها بعد تهزيئة محترمة من أمها ، أو يمكن نور تكلم بالجوال ..
لمن تمر بنت بالجامعة لابسة بربري أو أمر بالسوق من محل بربري وأول ما يخطر في بالي عروب ، وأرسلها مسج أعلق
لمن أتخيل عروب وهي تخز البنات في الجامعة لمن اتصور انها لابسة اسود بأسود اليوم ، مثلي يعني !
كل هالسيناريو اتخيله ، وارسمه واحفظه، والعجيب اني اصدقه !
وأدري انه بيصير في وقت جاي ، بعيد أو قريب ، مايهم ، أي شي، أهم شي انه بيصير. أحس بشعور الوطن بس لمن أكلم رشا وأسمعها تقول: انتي ليش مطلعة جوال أصلاً؟. احس بشعور الوطن لمن نجتمع انا ونوف ورشا، ولمن امي تتصل وتقول تراك تأخرتي بنجي ناخذك واخر شيء ما يجون ..

وطني بأصدقائي .. وبدونهم أنا في المنفى .. ولو رحت لأبعد مدينة أو أبعد بلد بظل أحملهم في قلبي
بظل أحسهم الوطن والمنفى ، الظل والنور ، بظل احسهم الكل ، بظل اشوفهم الأفضل .
بظل أتكلم لهم ولو كان حولي ألف شخص يسمعني ، بظل أسمع لهم حتى لو كنت ما أسمع ..
كل الطائرات تهبط عندكم .. كل الرحيل لايبعدني عنكم ، ولو رحلت باخذكم معي في حقيبة خاصة
في مكان آمن جدا في قلبي.

هذا الشعور العظيم، هذا الشعور الـ كنز ، هذا الإحساس الميتافيزيقي: اللي ما يحسه ولا يعيشه
ولا يشعر فيه بيكون : فقـير ..
ما استغرب أبد ولا انكر إنو : الصداقة أعظم من الحب .. مع الصديق تكون كل شيء ، كل شيييء
الأصدقاء نعمة .. نعمة .. وانتم ياصديقاتي نعمة كبيرة بحياتي .. نعمة غيرت مجرى حياتي.. نعمة ما تتعوض ..

وطني حيث سعدت، لاحيث ولدت او عشت..

* أنا لا أرض ولا سكن ، أنا عيناكِ هما سكني ..

[youtube:http://www.youtube.com/watch?v=8sgzbY-6LLw]
×
* لاتقرأ الا لمن تشوف الفيديو

غريبين احنا، خَلَقنا ونتكبر ، انعم علينا ونبعد .. يسهّل قربه ونجفى..
يرحمنا ونقسى، يغفر لنا ونعصي ..
نعول على الناس الكثير، والناس الكثيرة هذي كلها تحت امره ..
نأمّل فيه وفيها .. نأمل بالاشخاص ، والامل كله والفرج من نور ربي ..
نسألهم الرجعة ، ورجعتهم لنا او روحتهم كلها بتدبير ربي ..
نحب خلقه ، ونقصر في حقه !
ياربي اغفر لي .. اغفرلي .. اغسل ذنوبي .. اغسلني ..

* شكرا يا بنات صدقكم في هالفيديو جدا واضح .. لأنه يوصل القلب مباشرة،
ليته بس بدون ميوزك
* شكرا نور – لانك دليتيني على هالفيديو

×

لا أعرف ما الذي يأتي بك في أحلامي، بعد أن أدخلت في رأسي المتعفن فكرة نسيانك ، او لأكون أكثر صدقا : فكرة العيش (أي كلام ) بدونك .. لا أعرف أي هواء أتى بك وأظلمت دقائقي في الحلم .. كنت أرى أشياء جميلة ، كنت اراني بعد سنوات عدة وانا أرفل بالسعادة .. كنت أراك تختلس النظر إلي وانا أتجاهلك .. كنت أراني وانا وحيدة وسعيدة .. سعيدة جدا ..
كنت أراها تغرق في بحر على مرأى من عيناي .. كنت أرى فرحتك بموتها وأنت ترى اندهاشي ..
كنت أراها في دوامة البحر، تبتلعها هذه الدوامة لتصبح صغيييييرة جدا وهي الكبيرة. كنت أراها تتلاشى وتختفي كما جعلتك تتلاشى من حياتي ..
كنت أراني وانا مرتدية بطاقة كتب عليها اسمي ومذيله بـ google .. رأيتني وأنا أعمل في قوقل ! تخيل جمال أحلامي ، كنت أرى احلام سعيدة .. يكفيني أني كنت لا أراك .. يكفي احلامي أنك لاتزورها ولا تمر بها ، يكفي انك لاتحتسي القهوة بجانبها ..
أن أستيقظ مفجوعة مراراً من هول سقوطك ، من هول الحلم الآخر وما كتب على جبينك .. أن أراك تتخبط وتتهاوى وانا لا أقوى على فعل شيء هذا يعني أن كل ما دفنته في مدة طويلة قد نفض الغبار عن نفسه في دقائق .. هذا يعني أن أمضي يومي وحيدة وبتنهيدة .

اخشى أن اقوم بتفسيره فأسمع ما لا طاقة لي به ، أخشى أن أقول لمعبر الرؤى وحين اسمع التفسير أقفل سماعة الهاتف وأقول : ليييتني ما فسرته لييييييييتني ما فسرته بس ..

فقط .. أخرج من أحلامي .. دعني أنام .. دعني وشأني ، وامض ِ كما تمضي دائما ً .

×

أفكر كثير في وصيتي ، كل ما حاولت أكتبها اتراجع بخوف.. ليه أخاف؟ مو كلنا بنموت .. يمكن احيانا اتراجع لانو بحس بسخافة اللي كتبته في عين اللي يقراها .. بس تعني لي شي كثير، تعني لي كل حياتي .. ولهذا قررت قرار محد يفتح الوصية غير نور .. ومحد يقراها غير نور ..
ماعندي املاك ولا املك الملايين ولا أملك اي شيء ، أملك أهل طيبين وكريميين جدا .. ويتغاضون عن عزلتي الكثيرة .. املك صديقات لا يوزاي العالم ثقلهم ، أملك نور ..
املك شيء واحد او اثنين لكل شخص قابلته في حياتي .. مفكرة بشيء ع الاقل لكل شخص عرفته عن قرب او عن بعد الاهم انه مر بحياتي ، مفكرة له بكلمة – بورقة – بتذكار .. بأي شيء ..
اليوم أفكر بالوصية اكثر من الدقائق .. اكثر من الثواني واجزائها .. أكثر من الغصة اللي قمت من النوم وانا احملها ..

× يا انا .. سامحيني ، وحلليني ، ظلمتك كثير يا انا . ضحيت بك عشان اشياء كثيرة .. وبعد ايش ؟ اكتشفت ان هالاشياء ما تستحق.. يا انا سامحيتي حرمتك من نجاحات كثيرة وعاقبتك على ذنب ماعملتيه .. ماعوضتك ما كافائتك ..
يا انا سامحيني . يا انا شوفيني اتنهد .. شوفيني ادمع لك .. شوفيني قاعدة احاول اسوي لك اي شيء .. يا انا شوفيني متندمة
يا انا اوعدك بكل النجاحات الجاية .. بكل التعويضات الجاية .. اوعدك ما تتعثرين مره ثانية .. اوعدك احميك من كل الكذابين والخاينين
اوعدك ما تنامين وانتي زعلانة ،،أوعدك اني امسك بيدك لحد ما تحققين اللي تبينه،
يا انا سامحيني .. حلليني

حزن ..

و ورق أصفر .

/
ممنوع استخدامها في التصميم والتواقيع
والتعديل عليها بأي شكل من الأشكال.

canon EOS 400D
F/5.6
1/60 sec.
ISO-200
55mm