طـيري ، والـسما بلادك

احترم الفلم اللي بيوصل شيء، بيوصل هدف، بيوصل فكرة بطريقة راقية ! احترم الكاتب المخرج والمنتج والممثلين لمن يبحثون وينتجون  قصة تغير في المشاهد حاجة. ويمكن تغير من كل أفكاره. أحترم هالفلم كثيييييييييير! ماحد يتخيل قد ايش هالفلم غيّر فيني ولا حد يتخيل قد ايش شعوري وانا اشوفه وبعد ماشفته. فلم صادق باختصار!

اسم الفلم: Dead Man Walking – 1995 .
مدة عرض الفلم: 2 ساعة و 2 دقيقة.
نوع الفلم: دراما مبني على قصة حقيقة مكتوبة في كتاب من تأليف الراهبة اللي شهدت القصة كانت مسؤولة عنها  Helen Prejean

أجزم هالفلم بيغير من شعورك تجاه الحياة والحقيقة ولو بنسبة بسيطة! ما اقول الفلم هو نفسه بيغيرك لكني متأكدة لو وصلك الشعور اللي بيقوله الفلم راح يغيرك الشعور، راح تهزّك الرسالة اللي توصل. ما راح أتكلم عن القصة أكثر من إنو محور الفلم يدور عن راهبة وصلها طلب مساعدة من رجل محكوم عليه بالإعدام لاشتراكه في جريمة اغتصاب وقتل. الرجل مصر إنه بريء وطلب مساعدة الراهبة في اعادة المرافعة في القضية واستخلاص تخفيف للحكم والتراجع عن حكم الاعدام.

لمن كنت أشوف الفلم ما توقعت إنو من جد من جد بيكون صعب علي اتنفس في بعض المقاطع في الفلم، ولا ظنيت اني بتأثر من جوا! ولا ظنيت اطلاقا انو ممكن انظر لبعض الاشياء بنظرة مختلفة تماما. بجدارة الفلم يتكلم عن اشياء كلنا نحتاجها سواء كنا مسلمين او مسيحين او ندين بأي دين. احنا ندين لأنفسنا بالحقيقة ! الحقيقة و الحقيقة وحدها هي السبب في تحريرك! هي السبب انك تقدر تتقبل كل شيء حولك، هي السبب انك تعرف نفسك وايش قدراتك وايش اللي تستحقه! الحقيقة تستاهل منا نبحث عنها ونعترف فيها. المسألة في الحياة مو دايمن تدور حول الصح و الغلط لان تظل فيه اشياء نسبية ماهي محكومة بحكم واحد! لكن القضية اللي بيلفت نظرك لها الفلم  هي قد ايش انت قادر وعندك الرغبة انو تكون صادق مع نفسك بالمقام الأول، وبالتالي شوف قد ايش راح تكون صادق مع اللي حولك! قد ما الفلم صادق قد ما حطيت نفسي مكان المجرم ! وقد ماحطيت نفسي مكان اهل الضحايا،وقد ما حطيت نفسي مكان الراهبة اللي مو عارفة وش تسوي بالضبط لكن عندها يقين وايمان انو لازم تظل مع هالرجل للنهاية حتى لو كان مخطئ، حتى لو كان مذنب، لكنه يدين لنفسه بالحقيقة! لكنه رغم كل هذا يستحق يعرف حقيقته ويتقبلها ويتحرر ! اللحظة اللي نعرف فيها ( حقيقة ما )هي اللحظة اللي نبدأ فيها ننتقل لمرحلة جديدة أفضل، هي نفسها اللحظة اللي نتقبل أنفسنا ونتحرر من أي شي كان يأسرنا. اللحظة اللي تعرف الحقيقة هي اللحظة اللي فيها خلاصك. الحقيقة صعبة ومو سهلة وتقبلها اصعب ومو اسهل ! لكن يكفي انها ( تحررك ) يكفي انها تكفل لك تشوف العالم زي ماهو! بدون انكار وبدون تجاهل وبدون تظاهر…

أعجبني كثير إيمان الراهبة وتمسكها بفكرتها ومناضلتها لاخر يوم حتى تعطي الرجل المتهم هذا فرصة. قد ايش حلوة الحياة لمن يكون عندك ايمان ويقين بحاجة معينة ؟ ايمان يخليك مستعد تخسر اشياء كثيرة ولايهمك! الايمان اللي يخليك تناضل حتى النهاية. الايمان اللي يخليك توقف مع شخص مخطئ ومجرم لاخر لحظة في حياته وتشوف انفاسه وهي توقف وانت تتذكر قد ايش عطيته وقد ايش ساعدته يفهم الحقيقة ويفهم الدين ! اعجبني فيها قوة شخصيتها وتجاهلها للانتقاد. اذكر في مشهد كان واحد يقول لها كيف انتي راهبة وما تغطين شعرك! حبيت فيها حاجة انو كلنا بحاجة نكون قراب لربي حتى لو كنا مخطئين ، وحتى لو كنا مو زي المظهر العام للي يعتقدون انفسهم متدينين. انا ما اتكلم عن تصرف حجاب الشعر بحد ذاته، لكني اتكلم عن موقفها ومبدأها تجاه هالشيء ! كونها كملت مسيرتها كراهبة وعندها ايمان بكل حاجة وماخضعت لاشياء ما تؤمن فيها وشافت انها من حقها تكون راهبة وسخرت حياتها لله! هذا شيء جريء وتقدّمي فعلا! لانو الاحظ عندنا حاجة انو مثلا انت طالما عندك تصرف مو كويس تجاه دينك مثلا تسمع اغاني كلهم يطالعونك بنظرة: كيف مثلا بتغير المجتمع وانت تسمع اغاني؟ ومين قال انو الدين حصر على اللي مايسمع اغاني بس ومين قال انو التغيير بيد الملتزمين بس؟! او كيف هذا يطلع في برنامج دين وهو ملتحي ؟! نظرة اشوفها سطحية جدا ونظرة مستعجلة وتشخيصية لا اكثر.

فيه شيء وصلني من الفلم ومره قلبي انفتح له، إنو وين خلاصك ياترى ؟ طلعنا يمين يسار، مشينا ورا اهوائنا ، مشينا ورا كلام الناس ! طلعنا فوق او نزلنا تحت خلاصك في الدين ! الدين الصح وبس. خلاصك في حب الله اللي بيدلك على الحقيقة اللي بتدلك ع الحرية! خلاصك في الدين، في التشريع الي ينظم حياتك ويهذب نظرتك للحياة ويقوّم سلوكك تجاه خالقك وتجاه نفسك وتجاه الناس. خلاصك دائمن يبدا في علاقتك مع الدين، بعيد ؟ او سطحي ؟ او بس مظاهر ؟ ما راح ترتاح. هل انت قريب ؟ تعرف حدودك صح ؟ دينك يبدأ من جوا ويطلع برا ؟ ايمانك عميق ؟ تخطئ ويمكن كثير لكنك تدل طريق الرجعة كل مره ؟ أظمن لك حياتك راح تكون أفضل. مافي شي بيدلك ع الحقيقة غير الدين، ومافي شي بيحررّك غير الحقيقة في الدين. تخيلوا قد ايش احنا احرار بمجرد كوننا مسلمين! لكن المهم تفتح قلبك وعقلك للحقيقة! انت تملكها اصلا لكن استخدمها ! شوف قد ايش المسيحين مظللين بفكرة موت المسيح عليه السلام عشان خطاياهم وفكر قد ايييش انت محظوظ انو انت تعرف الحقيقة وانو المسيح رفعه الله وما انصلب ولا انقتل ولا مسته يد من ايدي اليهود ! شوف قد ايش القرآن اعطانا حقائق كل شيء وشوف قد ايش الرسول علمنا ( كل ) شيء نحتاجه وفهمنا ( كل ) شيء نقدر نبني عليه حضارات عظيمة ! افهم الدين صح، افهم كيف تكون علاقتك مع الله والرسول صح وراح تلاقي خلاصك ! يارب افتح قلوبنا للفهم الصحيح الوسط لهالدين .

الفلم على ما اتذكر مافي مشاهد مخلة : ) يمكن في تصوير مشهد الجريمة نفسها لكني صراحة مو متذكرة مضبوط، وسالة الفلم سامية جدا تقدر تستخلص منها كثير اشياء تناسبك. الهدف اللي بتوصل له الكاتبة والشيء اللي بتقوله جدا راقي! ولاحد يدقق على انهم مسيحين ومدري ايش كل واحد منا يعرف وش ياخذ وايش يرفض : ) . اداء الممثلين ! اداااااااء الممثلين شيء يذبح ! شيء روعة انو تشوف قد ايش اللي قدامك اخلص في عمله عشان يوصلك بهالطريقة، شين بين كان مبدع مبببدع في الدور، ماقدرت اتخيل احد غيره في الدور ! عيشني شعور المحكوم بالاعدام لدرجة مرات انحبست انفاسي وانا اتخيل نفسي مكانه وبعد كم يوم بيعدموني ! شيء فوق التحمل صراحة ! سوزان كانت الممثل المناسب في الدور المناسب! ما اقدر اقول شيء سلبي عن ادائها ولا اقدر اوصف قد ايش كان الدور معاها روعة ! السيناريو مكتوب بعناية ، والاخراج لايمكن يكون افضل من كذا!

دراما الفلم مو عادية، دراما الروح والدين، قد ايش روحك مرتبطة بالدين والحقيقة الكاملة، دراما توصلك قد ايش كل انسان يستحق الغفران طالما هو مقر بالحقيقة و يبغى يتطهر من ذنبه! قد ايش كل واحد فينا ولو كان مخطئ لكن عفو الله وحبه لعباده يشمله ويغرقه بعفوه وغفرانه! هالفلم يثبت لك اشياء كثيرة ويهديك مفاهيم حقيقة! ويعلمك قد ايش : ياخسااارة احنا مسلمين لكن افلامنا ما تتعدى في افضلها قصة حب سخيفة! وهم قاعدين يحطون طاقة سينمائية وانتاجية مو سهلة في فلم روحاني! ليه ما نتعلم انو السينما وصناعة الافلام بذاتها مو حرام! ليه ما نتعلم انو بالسينما ممكن تنتج شيء يغير في البشرية فكريا نحو الافضل ؟

ريفيو بسيط كنت كاتبته بالفيس بوك اول ماشفت الفلم وقيمته:

وكنت حاسة انو احتاج اتكلم اكثر عنه بالبلوق. * ماعندي تورنت للفلم

*

اضغط على الصورة لتشاهد الفيديو

الميوزك حق الـ end title كان لحاله ( حكاية ).حكاية بكل كلمة حكاية من معنى  .. ما اقدر اقول ان الموسيقى هنا تفوقت على نفسها ولا اقدر اقول انها تفوقت على الفلم لان الفلم صعب ينوصف.. وللحين اعتبره التوب في كل الاشياء اللي شفتها … الفلم بكل اللي فيه تفوق على كل شيء .

( حبيت أتكلم عن المؤثرات ا لبصرية لقيت إن الكلام يطول والأمثلة كثيرة فقلت بفرد لها بوست خاص )

* وإنتوا ؟ إيش حبيتوا أكثر شيء ؟

قبل أيام شفت هذا الفلم ^ : The Last ًWord . لمن بديت أشوفه ومشيت 10 دقايق بالفلم ماحسيت إنه بيعجبني مره.. بس لمن أنتهى الفلم حبيته كثير.. و لأسباب عديدة. القصة كانت جميلة وخفيفة والأهم ما كنت قصة الحب هي الشيء الرئيسي فيها .. والأهم برضو إنو مو من نوع الأفلام اللي تعرف نهايتها :/ وتحس انها سخيفة لأنه ببساطة دايم يخلون النهايات سعيدة جدا في مثل هالأفلام .. والحقيقة و الواقع ان النهايات مو دائمن تكون سعيدة . ماعلينا .. كان الفلم يتكلم عن شاعر وكاتب يكتب قصائد او رسائل مناسبات مثل انتحار شخص ، عيد ميلاك وغيره .. في البداية كان شخص مغمور لكنه قابل رجل في محطة القطار وطلب منه يكتب له قصيدة لعيد ميلاده . وبعدها الشخص هذا انتحر في نفس اليوم . فصارت القصيدة كأنها رسالة انتحار. ولمن كتبوا الصحف عن الحادثة اشتهر وصارت الناس تتعامل معاه في مثل هالأمور .. صار يشارك الناس في كتابة كلماتهم الاخيرة وأمنياتهم الكبيرة. أحد عملائه كان عنده رغبة نتيجة الضغوطات اللي يتعيش تحتها، كان يقول :

I would buy a cliff where people could come and throw shit off, you know, like fax machines or computers or whatever, things that piss them off ’cause they didn’t work right, like an outlet for machine rage. And the whole thing would be videotaped in slow motion so they could watch their heap of shit break into a million pieces back at home. Plus, for an extra couple bucks, I would attach an explosive so it would blow up on impact, just like they do in the movies, a big fireball.

معنى الكلام اللي قاله : إنو نفسه بحاجة زي المنحدر عشان اقدر ارمي فيها كل الأشياء اللي أغضبتني وضايقتني أو سببت لي ضغط. الأشياء المادية الملموسة مثل الاجهزة والفاكسات والحاجات اللي نتعامل معاها يوميا ونطفش منها وتسبب لنا ضغط، الأشياء اللي تعلق علينا واللي تخرب وقت الحاجة . الطابعة لمن بعز حاجتك لها تخرب او تكتشف ان الحبر ناشف ! هالأشياء تستحق ترمى من أعلى المنحدر لنهايته.. وكل العملية من ترفع يدك بأقصى قوتك وطاقتك -اللي ياما أضعفتها هالآلات- عشان ترمي الآلة لحد ماتطيح كلها كلها بتكون مصورة فيديوبالحركة البطيئة . ويعد بيركب فيها متفجرات بحيث اذارماها صاحبها يضغط زر وتنفجر وهي في الهوا وتحترق ! ولمن يرجع صاحبها البيت ياخذ الفيديو ويشوفها بالحركة البطيئة..يشوف كيف تخلص من ضغطه ، وكيف حرق السترتس اللي يحس فيه.. كيف نفس عن نفسه وتخلص من الأشياء اللي تنغص له عيشته وتخرب له مزاجه ..

فكرة عظيمة صح ؟ شخصيا أتمنى أتمنى يكون عندي مثل هالفرصة . وأول ما خلص الموفي قلت : i wanna have a cliff too so i can throw the things that piss me off. عنّي لو حظيت بمثل هالفرصة باخذ لاب توبي + طابعتي وبرميهم كلهم في هالمنحدر وبحط فيهم تفجير .. بتخلص من هالجهاز اللي يااامااا انقرفت واناا اشتغل فيه سهرانه وبدون نوم لأكثر من 24 ساعة عشان بروجكت في الجامعة .. بحرقه عشان ينحرق السترس اللي حسيته وانا اشتغل وانا اكتب كود ! وانا اكتب ريبورت .. بحرق كل شيء قرفني لمن القروب يكون سيء ويتهرب من الشغل ويطيح كل الشغل علي .. بحرقه وبتنحرق معاه كل إيميلاتي وبيروح كل ضغط مشروع التخرج وقرفه ! باخذ الطابعة اللي لازم كل شوي تتحفني وتفاجئني انها ماتطبع ولمن اروح لطابعة اختي اجي وبعد ربع ساعة الاقيها بدت تطبع!! يعني ما اكتفت بنرفزتي مره ! لا نرفزتني مرتين .. باخذ كتاب الـ computer Networks وبرميه بلحاله عشان ينفجر صدق ! ويحرم يكون بغيض وثقيل دم ! باخذ معاي برضو تلفون البيت بفجره اول واحد .. أكرهه لدرجة محد يتصورها وكل ما افصله أمي ترجع تشبكه .. خلاص enough من الناس اللي تدق كل يوم مره كفاية مابي اسمع صوت الـ رنننننننننننننننن . ينرفزني  مدري ليه ! و وراه على طول فلاشات الميموري حقت الجامعة ! و وراهم لعبة لـ لينا صوتها يسبب لي ضغط وإزعاج فظيع.. وبعدين باخذ التلفزيون وبرميه عشان جود تبطل تشوف براعم لمدة وعشان اتخلص من سترس طيور الجنة وازعاج اناشيدهم اللي كل مانزلت اسمعها ( مع انها ما عاد تطلع عندنا الحين فكة بس انتقاما للضغوطات السابقة . باخذ الفرن وبرميه لانو كل ما سويت كيك طلع فاشل .

خبروني إنتم لو حصلت لكم الفرصة  إيش اللي بترمونه وبتتخلصون من ضغوطاته ؟

سبحان الله ! كل شيء يسير وفق توقيت زمني (دقيق)

دايمن افكر لو كثير أحداث في حياتي صارت قبل أو بعد بـ ثانية وحدة !! وش قد التغير اللي بيصير ؟! أعتقد شخصيا ان ممكن يكون فيه تغيرات جذرية كبيرة كبيرة !!
(حتى لو كنت أشوف إنه ممكن بتقديم ثانية او تأخيرها بيكون شيء افضل لي ولحياتي بس من جوا أعتقد ان هذا افضل توقيت لكل شيء حدث.. الحمد لله ..)
كم من الأشياء اللي بتكون غير وضعي الحين ! كم من الأشياء اللي بكسبها وكم من الاشياء اللي كنت بخسرها ؟ كم مره صارت مواقف حسينا ان الوقت فيها هو العامل الرئيسي في الموضوع !! ولو تأخرنا أو قدمنا ثانية تتغير النهاية تغير جذري .. every thing happened for a reson !
تتذكرون مشهد الحادث اللي صار لـ Daisy في The Curious Case of Benjamin Button لمن كان بنجامين يتكلم عن انو كل شيء صار بوقت مدروس ولو تأخرت ثانية او كم ثانية كان يمكن ما صار لها الحادث .. الاحداث الصغيرة اللي وقفتها في طريقها والأشياء البسيطة اللي ما نلتفت لها كانت جزء من الخطة المحكمة!

في فلم من افلامي المفضلة اسمه cashback كان يعطي تقدير لكل ثانية نعيشها في حياتنا وانها ممكن تكون هي الحكم الاخير في قصصنا واحداث حياتنا .. كان يقول :
Sharon had seen the wrong second of a two second story -- للحين جملته في راسي ! لو مثلا شارون جات في الثانية الصح كان استمروا مع بعض وفهمت ليه هو تصرف هذا التصرف.. بس لانها جات في الثانية الغلط ! انفصلوا :/ ..

نفس الشيء في مسلسل How I met your mother ، كان يحكي لأولاده كيف قابل أمهم وانه الوقت كان هو الشيء الرئيسي اللي سمح لهم يقابلون بعض ويتزوجون ! وكان يقول لهم بالتفصيل وش صار وانه كل ثانية تأخرها كانت هي الشيء الوحيد اللي ساعدته يقابل أمهم .. وكان يقول لهم يمكن لو ما سويت الشيء الفلاني في طريقي كنت مالحقت على الحدث اللي بيصير ويخليني اقابل امكم .. وهكذا ..

الوقت مسألة كبيرة جدا .. الثانية تمر مع غمضة العين وما نعطيها اي قيمة مع انها تساوي اشياء مره كثيرة .. اشياء اكثر من اللي نتخيلها .. ممكن بثانية تتغير حياة .. ممكن يتغير شعور .. ممكن تتغير علاقة ! ممكن تستجاب دعوة .. بثانية ممكن يحصل التغيير .. بثانية وحدة نقدر نضيف لحياتنا اشياء كثيرة .. ممكن نكون ممنونين طوال حياتنا لثانية وحدة من هالحياة كلها !! تعالوا نفكر بكل الاشياء الحلوة والسيئة برضو اللي صارت لنا وكان الوقت هو البطل! تعالوا نعطي الثواني فيها قيمتها ، تعالوا نشكر كل ثانية مرت في كل قصة سعيدة او حزينه لان هالثانية اعطتنا اشياء كثيييرة لقدام ما كنا مقدرينها او ماكنا مستوعبين انو الثانية الوحدة ممكن تعطيها لنا .. تعالوا نحب الثانية ونحب الجزء من الثانية ،  تعالوا نحقق النجاحات في الثواني ..خلونا نكون ممنونين ولو لـ ثانية وحدة في حياتنا لأننا استغليناها صحيح ..من الآن …

*الفلم حاصل على جوائز كثيرة في مسابقات الأفلام القصيرة .
* للي مايبي ميوزك يوطي الصوت ماراح يتأثر الفلم ابدن.

السلام عليكم ورحمة الله وبركاته
جهزوا الجو ، واعملوا البوب كورن وشاركوني افلام سهراتكم .. ببدأ أنا طيب ؟ بخبص الجديد مع القديم اللي شفته قريب واللي من زمان ، بس اهم شيء الجودة .

***

Sleuth -2007

فن ! ببساطة فلم روعة .. وما أقوله عشان جود لو البطل ، بس لان الفلم جد روعة ، هو remake  لفلم في السبعينات.. مره حبيت الريميك ، حسيت المخرج والممثلين تفوقوا على أنفسهم من أدوات بسيطة عملوا حاجة مره حلوة ، كل تصوير الفلم في مكان واحد بس كان التصوير عن جد روعة والاضاءة والتلاعب فيها كان خطير .. جو الفلم نفسه مشوق لدرجة ماوقفته ولا دقيقة ،، مدة الفلم جدا مقنعة ساعة ونص تقريبا أو أقل. ما احب الأفلام الطويلة بدون فايدة .. الفلم من النوع اللي يوصل للمشاهد بسرعة.. وتعيش في اجواءه بشكل سريع .. اعتقد الكاست وفق تماما في إيصال الفكرة والقصة من كل النواحي تصوير واضاءة تمثيل واخراج وانتهاءً بالساوند تراكات الأليييييمة ! الجميل انو مايكل كلين مثل دور ميلو في السبعينات وفي الريميك مثل دور الروائي اندرو وجود لو صار يمثل دور ميلو.. حبيت الحركة كثير كثير .. لو بعدكم ماشفتوا الفيلم أرشحه لكم فكرته غريبة وحلوة وتستحق المشاهدة ..

****

All The King’s Men – 2006

فلم مع هالكاست الأليم ! وش تتوقعون يجي منهم ؟!! أكيد شيء أليم ! أنتوني هوبكنز – جود لو – شين بين – كيت ونسلت . وااااااوش على هالفلم بس ! أقدر اقول وبجداره إنه بيظل من الأفلام اللي خذت إعجابي الشدييييد، السكربت مكتوب بشكل راااقي ، التمثيل حاجة فظيعة ، التصوير والاخراج اتعب اقول وااااااااااااااااااااو . بالضبط نقلوا لي كمشاهد كل الحاجات اللي ممكن احس فيها مع اني شخص مو سياسي .. المخرج والمصور وشين بين بذاته بدع في مشاهد الـ speeches ، حسيت بشيء ثاني وانا اشوفه متحمس لهدفه ! ويدافع عنه ويعطي كل طاقته وكل صوته وكل جهده للهدف اللي يسعى له .. حبيت قربه من الناس .. حبيت لمن الناس تتجمع حوله وهو بكل طاقته وبأعلى صوته يعرض افكاره واهدافه.. للأمانة شين بين بدع في الفلم لكني اظل اشوف انه ممكن يكون فيه أحد افضل منه وأنسب للدور .. مع ان هالنقطة ما تعيب الفلم لكن ممكن تخليه أفضل .. شوف الفلم لكل الاهداف اللي تشوف الوصول لها صعب .. شوفها للفكرة اللي ممكن تموت عشانها .. شوف الفلم للسينما الحقيقة وشوف الفلم للدراما اللي قدمها..
شوف الفلم بكل شيء فيه وشوفه لكل شيء .. من اقتباساتي المفضلة في الفلم .

****

Fireflies in the Garden 2008

شفت هالفلم بوقته بالضبببببببط :”( كان عندي بس مافكرت اشوفه عطول ، بس بعد توصية الجميلة  هيفاء شفته وكويس اني شفته ، الفلم للأسف ما أخذ حقه أبد   وكثير أفلام أسوأ منه ماخذه أكثر من حقها سواء بالإيرادات او الانتشار .. الفلم فيه جو سحري عجيب .. مدري كم مره بكيت في الفلم .. كل شيء فيه كان صادق .. نظراتهم .. حركاتهم ..  الساوند تراكس .. جوليا روبتس بهدوء الأم الحنونة .. الأب القاسي اللي تكرهه غصب عنك . الابن المغلوب على أمره اللي واقع تحت سلطة أبوه وتعامله الغير منطقي .. التوتر اللي يعيشه لحد ماكبر .. كل حادثة بصغره كبرت معاه وبقى لها اثر في نفسه .. دفعته لأشياء كثيرة وبنفس الوقت ردته عن أشياء ثانية .. طريقة الاخراج برضو كانت ممتازة وتوصل للقلب بسرعة .. الفلاش باك والربط بين الماضي والحاضر بطريقة ذكية كان من اكثر الاشياء اللي تميز الفلم .. يمكن هالفلم مايعجب اي احد بس شخصيا عجبني جدا ولمن شفته قلت ايوه من زمان ما شفت فلم روحاني كذا ! أعتقد اللي يحبون الأفلام المباشرة جدا واللي لها نهاية مباشرة يمكن ما يستوعبون الفلم ..

****

Alfie – 2004

yah i’m a big fan of Jude Law
remake برضو لفلم في الستينات .. حبيت الفلم مرررررررررره مع إنو مافيه قصة خيالية مثلا ولا فيه شيء مميز جددددا .. لكنه بسيط والحاجة اللي وصلت لي من الفلم مره حسيتها شيء قيّم .. و ماتوقعته يكون حلو كذا .. تصوير واخراج و قصة خفيفة وحوار وكل شيء حلو…تحس ان المصور فيها فنان وعنده احساس عالي تجاه الزوايا والألوان وطريقة معالجة الصور والمشاهد .. حبيت الفلم من قلب كيف حياتنا كذا كانت تمشي بوتيرة نظن انها بيرفكت واننا حصلنا كل شيء نبيه ، وفجأة تختلف كل الاشياء وتدرك انك ماشي بطريق غلط تماما… وتبدا تحس ان حياتك اللي عايشها مو هي اللي تبيها وتبدا تعرف ايش الاشياء اللي تحتاجها وماهي عندك..الأشياء العميقة جدا والمعنوية مثل راحة البال…الشيء المميز في الفلم واللي خلاه من الافلام اللي لايمكن انساها هو انو الفي كان يحكي مباشرة للمشاهد ، مباشرة للكاميرا اعتقد انها نقطة ايجابية تحسب للفلم ، بهالطريقة حسيته يخاطب المشاهد بدون اي حواجز .. حسيته شيء فرندلي من جد .. فلم خفيف يحمل فكرة عميقة .

****

The Illusionist – 2006

ادوارد نورتن !! أكييييد طبعا بيكون الفلم فظيع ! انا مو مستوعبة ليه لحد الحين ما كتبت عنه :/.. أتعب أقول إن الفلم خطير من البداية للنهاية .. فكرة مميزة جدا جدا أداء أكثر من روعة ! أخراج وتصوير متكامل ومقنع لدرجة كبيرة .. مابي اتكلم عن ولا شي فيه لأنه اكيد بيكون اجمل لمن تشوفه وانت ماعندك اي خلفية عن القصة، لو ماشفتوه للحين لازم يكون هالفلم اول فلم على قائمة الـ must see ! من الأفلام الذكية اللي بآخر الفلم تقول : ياااااا الله ! ويخلص وانت لسا تطالع اسماء الكاست لانك تبي تشوف اخر دقيقة في الفلم لانه يستحق بجدارة ..

****

Grace Is Gone – 2007

يااا إحساااااااسه ، فلم مره مره مؤثر ! بارد هادي جدا لكنه مؤثر بطريقته الخاصة .. ما فيه صراخ عشان تتأثر او تبكي .. كل اللي فيه شعور صادق لأب يرعى بناته وياهبهم لتغيرات جديدة في حياتهم بطريقته .. الفلم يحكي عن فترة يومين بس في حياة هالعائلة .. تركيزهم على هاليومين وتفاصيله الدقيقة كان شيء بيرفكت ! نهاية الفلم اتوقع لأصحاب الدموع الفلمية انهم يمسكون كلينكس ويبكون .. تعبيرات بسيطة لكنها انسانية صادقة جدا مافيه انتاج ضخم ولا امكانيات نادرة..لكنه مؤثر وتوتشي بقوة.. جون كان فعلا الشخص المناسب لهذا الدور .. * عروب هذا الفلم شوفيه يصلح لك

****

The Soloist – 2009

هالفلم كنت أنتظره من لمن شفت التريلر وأول مانزل ديفدي شفته لاني كنت اتخيله شيء مره واو، امممم أقدر اقول انه 70% حلووو و 30% عادي .. القصة مره حلوة..
لكن فيه شيء ضايع او ناقص في الفلم ،، أحس الأدوار راحت للمثلين الغلط .. مثلا جيمي فوكس ما اقنعني بالدور أبدا .. كان ممكن الدور يظهر بشكل مؤثر واقوى من اداء جيمي فوكس.. مدري يمكن يكون مجرد رأي شخصي .. لكن انا اشوف ان الفلم كان ممكن يظهر بطريقة أفضل .. يا بكتابة النص يا بتوزيع الادوار .. روبرت دوني كان مقنع واداءه حلو بس مو أحلى ماعنده .. القصة مؤثرة فعلا ومقتبسة من كتاب. عن شخص مشرد بسبب مرض عقلي لكنه موهوب موسيقيا بدرجة كبيرة .. يتعرف عليه بالصدفة كاتب في جريدة ويحاول يظهر موهبته للعالم الموسيقي ومع الوقت يكتشف انو يعاني من مشاكل عقليه ومرض نفسي يمنعه من العيش كباقي الناس او يمنعه من عيش العيشة اللي يستحقها كشخص موهوب . أحس المشكلة برضو بالسكربت ما انكتب بالشكل المطلوب :/ . الاقتباسات اللي حبيتها في الفلم

don’t you ever watch list:

Last Chance Harvey

توقعته افضل من كذا ، اعتيادي جدا .. وفيه ملل .. شكل كل افلام الرومانس كذا ماحبيته ونص الفلم مشيته بالسكورل لأنه مافيه شيء خطير، تقدر تنط مشاهد بدون ما تأثر على القصة . الشيء اللي بيقوله الفلم انو ممكن الفرص تجي بوقت متأخر مثير وفي مكان ما نتوقعه .. الفكرة حلوة وصحيحة بس طريقة تقديمها سطحية ومملة واعتيادية ..

****

Lost In Translation

مدري على وشو هالفلم السقيم مشتهر ! طول الفلم وانا مدري وش الشيء الجديد اللي يجي مع كل مشهد . المشهد هذا نفس اللي قبله نفس اللي بعده مافيه شي بيقوله ! مافيه شيء تفهمه .. قاعدة اطالع وانتظر الفكرة تطلع او الشيء الجديد يبرز نفسه لقيت الفلم خلص وانا ما ادري وش سنع انهم يسوون على فكرة مخيسة فلم
ماعجبني ابببدا ابببببببببببدا.. ولا نهايته عجبتني يعني مدري وش يبون بالضبط مافيه خطوط عريضة للفلم بالنسبة لي .. صراحة حسافة عليه المتابعة..

نقدر نحقق أحلامنا بأي وقت .. هذا الشيء اكتشفته بعد ماسمعت وقريت وشفت قصص كثيرة ، عن ناس حققوا أحلامهم بوقت ما كان أحد يتوقعه منهم، او بوقت الكل متفق انه مره متأخر.. سيدة أعرفها ، عندها أولاد وبنات من عمري وأكبر كانت شهادتها ثانوية وما كملت الجامعة لانها كانت تبي تتفرغ لبيتها وأولادها ، والحين تخرجت من الجامعة وأخذت البكالريوس بعد ما وصلت عمر يقارب الأربعين يمكن .. منعها عمرها؟ لا ! .. نفس القصة لكن لسيدة كملت دراسة الكلية وسعت ورا الوظيفة وهي الحين مدرسة .. مع العلم انها جدة وعندها احفاد .. : ) أثر عليها العمر ؟ لا !

أعتقد أن تعليب الأحلام وختمها بمدة صلاحية وانتهاء، ظلم لنا ولأحلامنا اللي تنتظر تحقيق.. نقدر نأجل ونقدر نغير الخطة لكن أبدا ما نتنازل عن أحلامنا ..
اللي عزز هالشعور عندي هالأيام هو فلم : The world’s Fastest Indiana .. كان يتكلم عن رجل كبير طاعن في السن ، يمتلك ورشته الخاصة والبسيطة جددددا والمحاطة بعتاب الجيران له لأنه أزعجهم بالعمل على دراجته النارية.. على كبر سنه كان يعاني من مشكلة قلبية تقدر تعيقه ببساطة عن أشياء كثيرة .. لكنه أدرك ان الأحلام قابلة للتحقيق حتى لو تقدمنا في العمر، وإن الحياة بدون ما نحقق أحلامنا تظل ناقصة .. وتظل تحتاج منا نكملها .. فسافر لأمريكا بدراجته ذات القدرات البسيطة .. بس لانه كان يحلم يسجل رقم جديد في سرعة الدراجات النارية سعى ورا حلمه وحققه .. وبعدها ما توقف لأن الحلم تحقق وخلاص.. لا أبدا ظل يسعى للأفضل وعاش الحلم : )

* احنا مدينين لأنفسنا بحلم على الأقل لتحقيقه مهما تأخر الوقت ..* السماء من تصويري ، الخامات في الطائرة الورقية من ستوكات لـ : http://amandaclayton.deviantart.com/ و http://masterjinn.deviantart.com/ رسم الخطوط كان بادوبي اليستريتور والمعالجة كانت بالفوتوشوب ..

أهلين كيفكم بعد الحريقة

welcome summer  شباك التذاكر الأمريكي ملتهب and guess what ! كل التوب تن ما ني متحمسة الا لفيلم ساندرا بولك

قبل فترة أفتح فولدر الأفلام وأرجع أسكره ، ماني متأكدة أي اختيار بيكون الأفضل للمتابعة .. وطبعا زي ماتعرفني ريم يبغى لي مزاج عنيف جدا للأفلام .. ولازم أكون مره رايقة لجو مشاهدة سينمائية.. و مو جديد لو قررت أشوف فلم وبعد دقيقتين اسكره لأنه ببساطة مو جوي هاللحظة .. والغريب إني أرجع اشوف أشياء قديمة .. يمكن خوفي انو الجديد اللي راح اشوفه ما يكون قد المستوى او قد التوقعات وضمان لنقطة انو الشيء اللي شفته من قبل وعارفة إنو كويس بيكون حلو وبعرف وضعي معاه ع الأقل أحد عنده هالمشكلة غيري ؟

هذي أفلام شفتها قريب وبعضها من زمان وماحصلت فرصة أكتب عنها: كلها توصيات للصيف أو توصيات بعدم المشاهدة :

***
The Black Balloon

الفيلم الأليم بتفاصيله الصغيرة جدا .. هذا الفلم يحكي عن معاناة ذوي الاحتياجات الخاصة او بالأصح معاناة عائلاتهم لان مرات يكون الشخص المحتاج نفسه مو مدرك لوضعه بالشكل الكافي ، فما يستوعب صعوبة الوضع .. لكن الأهل يعانون معاناة حقيقة لانهم مدركين ان حياتهم بعد راح تكون مختلفة تماما بمجرد وجود شخص يحمل اعاقة معينة في عائلتهم.
الأشياء البسيطة تتغير بشكل كبير .. من الجلوس على طاولة الاكل لموعد النوم مرورا بالتنظيف والاستحمام ، والأهم وسائل السلامة وقفل الأبواب .. الحرج اللي مرات ممكن يحسه بعض افراد العائلة .. طريقة تعامل الاغراب او الاشخاص اللي مالهم علاقة مباشرة بالعائلة مع هذا الحدث.. طاقة الاحتمال والتجاوزات اللي تصير من قبل افراد العائلة .. قصص الحب الصغيرة اللي تنولد في مثل هالظروف، لمة العائلة وتجاوزهم لكل محنة تصير .. كل هالتفاصيل الصغيرة الأليمة تتعرفون عليها في هالفلم .. نصيحة للي مايحبون التفاصيل الصغيرة احتمال كبير الفلم ما يعجبكم .. لان الفلم ما يعتمد على حدث غريب او كبير .. كل الفلم مبني على احداث عادية وروتينية .. لكن التفاصيل خلته مختلف ..
الفلم أسترالي انتاج 2008 – تقييمه 7.5/10
***
Elizabethtown

طبعا وللمرة الألف انا مو big fan للأفلام الرومانس بس هذا فيه شي يجنن .. فيه شي حلو مررره ، فيه شعور يخليك تتابع الفلم لمن اخره وانت مبتسم.. شخصيتها المختلفة عن شخصيته هي كانت السبب انهم يتكلمون لبعضهم لساعات طويلة .. تذكرت : ” احيانا يقود التشابه إلى الحب ، وأحيانا التنافر يقود إليه ” هي نظرتها مختلفة لكل شيء غالبا ، هو يمر بفترة يأس من كل شي ، اجتماعيا و وظيفيا و عاطفيا.. الحوارات بسيطة كثير ورائعة ، تدخل القلب وترسم لك ابتسامة لليوم كامل..حلو كثير لو حابين شي يبهج يومكم ..
الفلم أمريكي انتاج 2005 – تقييمه 6.4/10

***
He’s Just not that into you

هذا الفلم بالذاااااات ماتوقعت أحبه أبدا ابدا أبببببدا.. حسيته زي نوعية sex and the city .. واللي طبعا كرهته لأنه فلم بايخ ..بس لمن شفته مدري ليه عجبني .. على ان القصة ما كانت شيء مختلف ابببدا على نطاق الرومانس موفيز .. لكن اقدر اقول ان القالب جاي بشكل ممتاز، والطريقة اللي تقدم فيها الفلم للمشاهدين كانت رائعة وغير مملة وجذابة .. تنوع القصص والشخصيات وكثرتها مرات ممكن ينعد سلبيه بس في هالفلم كان إيجابية.. مره حبيت الفلم لدرجة اني قعدت اهذر على ريم <– ريم صديقتي الحقيقة يعني – هل فيه قواعد للحب ؟! هل فيه استثناءات .. علاقاتنا مع اللي حولنا وانفصالاتنا الشخصية مع اصدقائنا بشكل عام هل هي متعلقة بقواعد او استشثنائات .. وهالقواعد فعلا شيء ناجح في العلاقات ؟ والا الاستثنائات هي اللي تنجح ؟ والا ولا واحد ؟؟ أحس الشيء اللي يبي يقوله الفلم بصوت عالي stop finding love let’s love finds you .. لمن يكون مقدر لنا نكون مع شخص كصديق او حبيب راح نكون معاه وراح تتسخر لنا الاسباب اننا نكون سوا .. ولمن ما نكون الاشخاص المناسبين ماتنجح لا قاعدة والا استثناء .. جمال علاقتنا وصداقتنا بأنها مقدرة لها ان تكون هكذا.. ماننتظرها تجي او تصصير ، لا هي تصير من نفسها .. هي تجي لحد عندنا ..أكثر شيء تألمت عليه لمن شخصية بالفلم انفصلت عن زوجها مو لأنه خانها ، لا لأانه كذب عليها وقال لها انا مارحعت ادخن ، ولمن شافت الباكت في جيبه قررت اخيرا انها تتطلق.. حسيت السبب على انه صغير لكنه عميييييييييييييييييييييييق جدا وممكن ينبنى عليه ثقة حياة بأكملها ..
الفلم أمريكي إنتاج 2009 – تقييمه6.5/10
***
Crossing Over

بكل بساطة فلم يبكي، يتكلم عن القرين الكارد واستماتة الناس للحصول عليها وكيف بعضهم يبيع نفسه عشان جنسية امريكية ويظن انها بتفتح له آفاق أوسع..! وكيف بعضهم ناظل وعانى عشان يحصل ع القرين كارد، الشيء الجميل انه تناول أهم الشرائح من مهجرين امريكا، المسلمين والمكسيكين والاسيويين عموما واليهود – فيه قصص في الفلم كانت نهايتها أليمة جدا وانسانية جدا ، وفيه قصص لمن تشوف النهاية تهز راسك وتقول : وش استفادت ؟!! أداء الكاست كان ممتاز كثير ومو متكلف أبدا .. الفلم اجواءه مو فرايحية أبدن .. عن جد الفلم يستحق المشاهدة..
الفلم أمريكي إنتاج 2009 – تقييمه  6.9/10

***

“Don’t You Ever Watch” List :

***
I’m Not There

ساعة الا ربع مضت من زمن الفلم وانا مو فاهمة شي .. ولا فاهمة علاقة المشاهد والاحداث ببعضها.. سكرته وحذفته غير مأسوفا عليه ..

***
Yes Man

مشكلة لمن ترفع توقعاتك للفلم ويطلع مخيب للتوقعات ، يخيب أملك أكثر ! ماحبيت هالفلم بتاتا بتاتا بتتا .. بكل بساطة تعرف للنهاية وتتنبأ فيها .. وكالعادة شخص حياته مقلوبة وتعدلت وقابل حب حياته وبلا بلا بلا.. في البداية كان الفلم مره حلو بعد البداية من عند النص لمن النهاية وانا صابني منه طفش مو طبيعي .. جيم كاري نفس اسلوبه في الكوميديا مايتيغير
يعني يعتمد على حركات هبله واشوفها سخيفة :/ بينما انا أفضل كوميديا الموقف .. فالفلم بكبره ما اعجبني أبدا .. اللهم فكرة انك جرب تقول نعم لكل شيء .. والصدق ما ناسبتني الفكرة لأنها مو اقعية بتاتاً

***
Miss Pettigrew Lives for a Day

يقطع ابو السقامة ! شخصيا أقدر أحط الفلم في قائمة أسخف عشر أفلام شفتها بحياتي ! ممل وغبي ومكرر وسخيف. والاداء كان ضعيف ومتصنع .. ويطفش لدرجة كبيرة
طول الوقت امشي السكورل بس عشان يخلص اللي يحس ان ذوقه في السينما يقارب ذوقي نصيحه لااايضيع وقته في هالفلم السقيم

***
confessions of a shopaholic

يا للسقامة القوية || ، مشكلة أصحاب هالأفلام حصروا انفسهم في قصة معينة اي احد متابع للسينما بشكل جيد يقدر يعرف النهاية ببساطة وهذا شيء سلبي يحسب ضد الفلم .. لان ايش الفايدة لو كنت جازمة ان النهاية كذا وكذا وانا لاحداث بتصير كذا وكذا .. من كثر ما شفت أفلام تحكي نفس الأحداث بس القصة بشكلها العام تختلف .. قاعدة اقول لاختي بيصير كذا وكذا وكذا وبعدين كذا وكذا وفي النهاية صار كل اللي توقعته من كثر ما ان القصة ضعيفة جدا .. الشيء الغريب واللي يقهر ان بداية هالافلام او فكرتها بشكل عام تكون لطيفة وتحس انك متقبلها .. بس تشوفها تخرب القصة كل انطباع جيد عن الفلم .. اقدر اعتبره فلم teenagers  ، أشوفه سخيف وممل برضو .. مافيه اي تشويق .. واي حركة كوميدية كنت اشوفها (ثقالة دم )

***

يكفي للحين:] الجزء الجاي بالبوست القادم
خبرونا عن قوائكم الجميلة والقبيحة ؟