كيف أصنع دفتر يدوياً ؟

تقريبا من سنتين ونص خضت تجربة العمل الخاص، وبعت دفاتر عملتها يدويا في أحد البازارات. راح أنشر تجربتي قريب <- – بدري مره ترا
المهم بعدها صرت أتلقى طلبات من الناس القريبة ، ويعطوني اللي يبونه في الدفتر ، مثلا مقاسه وشكله و شكل الورق وأنا أحاول قد طاقتي وأسوي اللي أقدر. حبيت أشرح الخطوات البسيطة لعمل دفتر يدوي، بعض الناس تحب تعمل اشيائها بنفسها وكنوع من نشر الفائدة راح أنشر دفاتري وكيف أعملها وإيش الخامات اللي استخدمها. هالمرة راح أشرح طريقة دفتر مبسط وحجمه صغير، عملته قبل كم يوم عشان يكون مكان لأفكاري ، آخذه معاي وين ما أروح، أسجل فيه أفكاري وأهدافي الصغيرة والكبيرة، اللي ناوية أبداها واللي مو ناوية .

بسم الله نبدأ.

الخامات والأدوات :
#ورق كرتون ( أي كرتون في البيت ، كرتون بيبسي – مناديل أي شيء يمشي حاله )
#أوراق تغليف ( بعضها كنت مشتريتها وبعضها بقايا اوراق من هدايا )
#أي شيء تفضلونه للتزيين سواء شرائط او أزرار. كله يرجع لذوقكم.
#مقص – صمغ.

أولا:
أقص الكرتونة بحسب المقاس اللي أبي. مرات أكتفي بقصها ،( ومرات أنزع الطبقة اللي فوقها عشان تظهر خطوط الكرتون، وتعطي شكل جميل ).

ثانيا:
أبدأ مرحلة تزيين الكرتونة بأي شكل أنا حابته. في هالدفتر اخترت أزينه بأوراق تغليف بطريقة عشوائية وبألوان مختلفة. أول شي لصقت القطعة اللي فيها ورود بنفسجية، وفوقها لصقت القطع الثانية زي ما هو موضح بالصور:

بعد ماخلصت مغطية الكرتونة بورق التغليف، حبيت أضيف شي زيادة من شيء أحبه. شخصيا أحب الريبونز المنقطة، فاخترت هاللون وقررت أحطه في أحد الزوايا:

* كانت فكرتي بهالطريقة ، انو زي ما يحطون ريبون أسود على صور الأشخاص المتوفين، أنا احط ريبون بلون مليان نشاط وبشيء أحبه، أبي أعبر عن الدفتر بطريقة أنو يحمل حياتي وأفكار حياتي، وتجاربي البسيطة وأهدافي المعلنة وغير المعلنة.. ببساطة دفتر الحياة.

الحين بعد ماخلصت تماما الغلاف، بقى الورق الداخلي + السلك. شخصيا أفضل السلك لأنو مرات جربت أخرم الكرتون مع الورق واربطهم بشريطة، بس طلعت الفكرة غير عملية خصوصا لدفتر راح أستخدمه كثير. فصرت أسويه سلك. أخذت ورق أبيض A4 لانه مو مسطر ، ما أبي أي سطور ! أبي ورقة ( بيضاء حرة ) وقصيته على نفس حجم الغلاف، وأخذته المكتبة وطلبت منه يسوي له سلك . والنتيجة :

بإمكان أي احد يصنع الأجمل إذا استخدمنا خيالنا وأفكارنا البسيطة. الأشياء اللي من صنع يدنا ونتيجة لأفكارنا راح يكون لها معزة خاصة عندنا حتى لو تطورت مهاراتنا. راح تبقى تحمل معاها ذكريات اليوم اللي عملت فيه هالشيء، وراح تظل تحمل معاني كبيرة داخلك. جربوا تصنعون ولو حاجة وحدة بس بيدكم وبجهدكم. توفير مال واستثمار جهد و وقت ومتعة في حاجة ترافقك طويلا : ) .

نعم إنها الحقيقة! الحقيقة و ليست الخيال .. نعم صدق ما تراه نوال تنزل طبخة اخرى في بلوقها . أنا مقدرة ان فيه كثير راح ينهارون على الطبخة وعلى سناعتي، وما اقدر اقول لهم شيء لأن معاهم حق صراحة ! بس عزائي الوحيد لهؤلاء انو : لا تيأس يوما ما ستتذوق طبخي وستنهار أكثر

اضغط الصورة للتكبير والانشكاح

نعممممممم هذه الصورة ليست بخيال! هذه الطبخة التي ستجعلك منسدحاً تستطيع عملها عزيزي رب المنزل هكذا:

المقادير:
كيس خبز توست ( هرفي ) واللي بيسوي لوزين بزعل منه!
صدور دجاج بدون عظم.
كريمة الخفق ( المراعي ) <—تحسون لها اسهم ؟.
قشطة ( اي شي ماعندي مشكلة بس يفضل التاج ).
جبن موزاريلا ( المراعي ) أو جبن كرافت مبشور.
بصل – فلفل رومي ( ملون والا بزعل منكم ) – بهارات – بقدونس – نعناع
صينية – ملعقة خشبية للتحريك – سكينة للتقطيع – فرن – قدر للكريمة وقدر للدجاج <—فيه إخلاص اكثر من كذا ؟

الطريقة:

اضغط الصورة للتكبير والانشكاح

أولا: نسلق الدجاج مع البهارات والفلفل الرومي عشان يصير طعمه جميل جدن. بعدين نقطع البصل والفلفل الرومي ( الملون ) شرائح طويلة ونحطها بتيفال مع بقدونس ونعناع ، ونحط شووية زيت بس عشان الكشنة. بعد سلق الدجاج نقوم بتنتيفه عشان يتأدب ونحطه في التيفال مع اصدقائه البصل والفلفل والنعناع و البقدونس و الزيت ، نضيف عليهم بهارات مثل: مسمنة –  فلفل اسود …الخ. <—ترا توهقت ما تعرف وش باقي البهارات.
نحركهم عشان يندمجون سوا ويحبون بعض ونسكر عليهم بالغطا ونحطهم على النار .

بينما الاصدقاء على النار ، ناخذ التوست ( هرفي وش قلنااااااا؟ ) ونشيل اطرافه ونرص طبقتين فوق بعض من التوست في الصينية. واللي حاب يدهنها بمايونيز يدهن ليه لا ! انا ديموقراطية ، بعدين خليكم زيي وروحوا سووا سلطة انا سويت سلطة الزبادي بالخيار.

بعد ما يخلص الدجاج والبصل من على النار وتحسون انهم تكشنوا كويس نطفي النار ونحط الدجاج المكشن مع البصل فوق التوست ونحاول نخلي شكله مرتب.  بعدين يجي هنا دور القشطة وكريمة الخفق <—اصدقائي دائمن وأبدن | | علبة قشطة مقابل علية صغيرة من كريمة الخفق ( اصغر مقاس ) نخلطهم وبعدين نحميهم على النار لمن يفور الخليط ، ناخذ الخليط ونصبه فوق طبقة الدجاج:

اضغط الصورة للتكبير والانشكاح

الكريمة راح تتماسك مع الدجاج ويتشربه المدري ايش وبينزل شوي منه ع الخبز تحت وهذا قمة اللذة، بعدين نحط فوقه اخر شيء حبن موزاريلا او جبن كرافت مبشور. ندخلهم الفرن لمن تذوب الجبنة وتتحمر شوي :

اضغط الصورة للتكبير والانشكاح

تقدم مع البطاطس المقلية كما عملت حفظني الله، وبالهناء والعافية . تستطيعين أن تذلين أهلك فيها وكل شوي تقولين يوم سويت هذيك الطبخة ! تذكرين قبل ما اسوي هذيك الطبخة ، تستطيعين ان تتمسكني عند امك بعد عمل الطبخة وتقولين أبي أروح لكذا وكذا ستلاحظين أن امك ستسمح لك مباشرة، وحتى تظمني رضاها عن الطلعة قولي بمر على هايبر بندا وبجيب طلبات الطبخة حقت بكرا خخخخخخخخخ سترين الانشكاح التام

الطبخة اهداء لكل اللي يحبوني شكرا لكم لولا الله ثم انتم ما وصلت لهالمستوى والنجاح الباهر في الطبخ و حبيت أبشركم بقرب صدور كتابي في الطبخ والاهداء لكم طبعا .

السلام عليكم ورحمة الله وبركاته ، كثير سألوني عن كذا صورة صورتها فيها بوكيه عن انو ( ايش هذا – كيف سويتيه ) فحبيت افيد الكل بهالشرح المطول

Bokeh / البوكيه :
كلمة يابانية الأصل وتعني Blur ( مشوش – غير واضح – مطموس المعالم ) وهي باختصار المناطق الخارجة عن منطقة الفوكس في الصورة ، البوكيه عكس الـ sharpness  او الحدة لأن الحدة تحدث في المناطق اللي عليها الفوكس في أفضل حالاته بينما البوكيه يقع في خارج منطقة الفوكس تماما.

بعضهم يصنف البوكيه إلى نوعين :
1- هوليود ستايل بوكيه hollywood style bokeh
هذا الستايل اللي اغلبنا نعرفه او نشوفه وهو اللي تصير فيها مناطق الضوء اللي خارج منطقة التركيز عبارة عن دوائر غير واضح منها الا لونها تقريبا وهذا نقدر نحصله بوجود ضوء في الخلفية ومجرد عزله او تشتي الفوكس عنه ينتج لي بوكيه .. مثال انوار السيارات ، أنوار صناعية ، ضوء الشمس المنعكس او النافذ من خلال عناصر متداخلة ( مثل ورق الشجر ) مثل :

للمزيد : هنا
2- cream cheese bokeh
في هالنوع اقدر اقول انه العزل اللي نعرفه بشكله الطبيعي ، يعني لمن تكون الخلفية بشكل كامل معزولة عن الهدف وتنتج لنا تدرجات بحيث عناصر الخلفية تنمدج مع بعض وتصير  شيء واحد . مثل :

( طبعا نقدر نوصل لهالنوع من البوكيه بطريقة العزل العادية وهو كل ماقلت المسافة بين العنصر والعدسة مع فتحة عدسة اكبر كل ما حصلنا على خلفية معزولة عن العنصر ، وكل مابعدنا عن الهدف كل ماقل العزل والخلفية الضبابية .. وقوة العزل تختلف من عدسة لعدسة . )

كيف أقدر ألتقط صورة بوكيه ؟
العلاقة بين رقم العدسة و الـ DOF  ( عمق الميدان ) علاقة عكسية ، بمعنى كل ما كبر رقم العدسة كل ما قل عمق الميدان ، وكل ما صغر رقم العدسة كل ما كبر عمق الميدان ، و التصوير بعمق ميدان كبير يعطينا فرصة عزل أكبر وبالتالي فرصة لتواجد البوكيه بشكل أكبر .. مثال :

الصورة ع اليمين استخدمت عمق ميدان أصغر وزي ما انتوا شايفين قوة البوكيه اضعف منها ع اليسار ، الصورة اللي باليسار زدت العزل وبمعنى ثاني زدت فتحة العدسة ( قللت الرقم ) وبالتالي كبر عمق الميدان واعطاني منطقة عزل ممتازة وظهر البوكيه كمناطق ضوئية خارجة عن منطقة الفوكس ..

مثال ثاني :
في هذي الصورة أخذت عمق ميدان صغير وزي ماهو واضح بالصورة البوكيه ضعيف ويالله مبين ، في هذي الصورة زدت عمق الميدان وكانت الخلفية تساعد لان ورا الهدف نور الشمس ورا اوراق شجر .. في الصورة هذي تعمدت ازيد عمق الميدان والعزل لاكبر درجة أقدر عليها وزي ما انتو شايفين البوكيه في أفضل حالاته في الصورة الأخيرة ..

*

يعني نقدر نطلع بنتيجة انه عشان نحصل على بوكيه لازم تكون المنطقة خارجة عن الفوكس وبعمق ميدان كبير .. أو نقدر نتلاعب بالفوكس ومانضبطه صح وبهالطرقة نحصل على  بوكيه .  في ستايل هوليود : على حسب ضبط الفوكس وعمق الميدان ينتج لنا بوكيه ضعيف – جيد – ممتاز .. الضعيف لمن يكون الضوء متركز على حدود الدائرة ومو في النص ، يطلع شكلها حاد اكثر من المطلوب . الجيد او المتوسط : نحصل على دائرة ضبابية لكنها مو في أفضل حالاتها ، بمعنى ان الضوء متوزع بشكل متساوي تقريبا على الحدود والمنتصف . الممتاز : وهو اللي نسعى له لمن الحواف تكون مررره مو واضحة ومشوشة والضوء متركز بالوسط ومنتشر بشكل اضعف على الحواف

* استخدام الترايبود غير محبذ ، لأنه مايهمنا تركيز الصورة و حدتها بقدر مايهمنا قدر التشويش في الصورة.
* استخدام سرعة غالق بطيئة مرات تساعد في تكوين بوكيه ممتاز وبتوزيعات جميلة
* استخدام فتحة عدسة عدسة كبيرة ( رقم صغير ) مثلا 3.5 – 1.8
* بعضهم يحصر البوكيه في الدوائر فقط ويعتبر النوع الثاني شيء ماله علاقة بالبوكيه انما هو عزل عادي عن طريق عمق ميدان كبير .
* الناس بدت تبتكر في البوكيه لأن من جد نتائجه روعة ، فصار فيه بوكيه بأشكال قلوب و ورود و نجوم وهالشيء نقدر نحصل عليه بمثل هالطريقة
المشروحة في الفيديو . شخصيا ما جربتها بس ان شاء الله يكون لي تجربة قريبة .
* عدسة 18-55 تفي بالغرض لعمل بوكيه، لكن النتائج تكون اقوى وافضل بطبيعة الحال في العدسات اللي عندها قدرة عزل اقوى . في صوري اللي شرحت عليها استخدمت 18-55 و 24-70 mm من كانون طبعا ..
* استفدت من : هنا و هنا و هنا .

هذا الشرح جهد شخصي و نتيجة قراءة من المصادر اللي ذكرتهم ونتيجة تجربة .. يحتمل الخطأ ويحتمل الصواب ، أيضا من غير اللائق نقل الدرس بدون ذكر المصدر ..

السلام عليكم ورحمة الله وبركاته
طبعا كلنا نعرف إنو مافيه طريقة أحسن لالتقاط تفاصيل الصورة الصغيرة جدا مثل الحشرات ، قطرات الماء وغيرها إلا بعدسات الماكرو ، اللي تقرب لك الهدف بشكل كبير جدا، وطبعا تفتح لك مجال أكبر في الإبداع أثناء تصوير الهدف .. برضو نعرف إن عدسات الماكرو ماهي متوفرة بسعر رخيص ( ع الأقل الممتاز منها ) ، فلذلك فيه طريقة للي ميزانيتهم ماتسمح لهم باقتناء عدسة ماكرو / يعني زي ما قريت macro for poor :p والصدق إن الفقير مو بأدواته ، الفقير بأفكاره ورؤيته الفنية للهدف اللي يبي يصوره، ياما ناس عندهم استديوات كاملة لكن الصورة اعتيادية وما فيها أي حس فني ..
الطريقة هي معروفة باسم: Reverse Lens technique او بالعربي : تقنية قلب العدسة ..

كيف ؟
كاميرا SLR -  أي عدسة متوفرة عندك تـفي بالغرض،  وأنا هنا استخدمت 18-55 وكانت كافية جدا ..
1- سكر الكاميرا ، وفك العدسة.
2- اقلب العدسة بحيث إنو الجزء اللي كان متصل بالكاميرا يكون الآن هو الأبعد.. وطبعا تحتاج تثبتها بيدك
3- 18 ملم هو أقرب مسافة ممكن توصل لها بهذي العدسة.. يعني هنا جاية العملية عكسية لأننا قلبنا العدسة.. لأان 18 بالوضع العادي للعدسة يعطينا أبعد مسافة عن الهدف، فلمن نقلب العدسة راح يكون 18 ملم أقرب مسافة توصلنا للهدف .
4- يفضل تضبط الفوكس على المانيول فوكس لأان الاوتو ماراح يفيد كثير.
5- يفضل برضو تختار وضع المانيول .
6- مسألة exposure /  التعريض مره صعبة ، لأن ماراح يكون فيه قراءة للضوء لان العدسة تعتبر مفصولة ! فلذلك تحتاج تجرب كثير مع ولازم لازم تمسك العدسة المقلوبة من كل جهاتها بحيث مايدخل ضوء من الجوانب، ولو دخل معناته الصورة راح تطلع كلها ضوء مافيه عناصر.
7- عملية مسك العدسة باليد مره صعبة وعن نفسي الكاميرا أكبر من يدي فما قدرت احافظ على عملية التوازن أبدا، فلصقت العدسة بشطرطون عشان ما يدخل الضوء وعشان ما أتعب وانا ماسكة العدسة طول الوقت،
8- استخدام الترايبود ماراح يخدم أبدا لأنك تحتاج تقرب الكاميرا للهدف وممكن يكون الترايبود عائق ، وأنا صراحة جنني
9- عند التركيب والفك خذ بالك من السينسور لا يتوسخ، حاول تفكه في مكان مافيه غبار.
10- افتح الكاميرا وابدأ بالتجربة .. ولاتنسى تحاول تقرب للهدف قدر الإمكان ..

أول تجربة لي:

نماذج لصور التقطت بهالطريقة :


*اضغط على كل صورة للتكبير( كل صورة في معرض صاحبها في الديفينت أرت ) .

ممكن تستخدم :
reverse rings : زي الحلقة تتركب بحيث تسمح لك بتركيب العدسة مقلوبة مبشارة على الرنق بدون ما تمسكها وتتعب
extension tubes : أداة تتركب بين العدسة والكاميرا وتسمح لك تاخذ فوكس أقرب من المسافة الممكنة للكاميرا وبالتالي ماكرو أكبر واكبر .. يعني تفاصيل أكثر وأكثر ..

على قد ما كانت العملية صعبة إلا إني استمتعت كثير لأني عرفت أكثر عن عالم الماكرو اللي دايمن يستهويني وأعطاني فرصة أخوضه قبل ما توصل عدستي الماكرو الجديدة ان شاء الله،
هالطريقة برضو إعطتني الفرصة أجرب حظي مع الماكرو وأفهمه وخلتني أقرا أكثر وأكون مستعدة لنوع جديد من التصوير، برضو شيء مهم نعرف انه ممكن من أبسط الأدوات اللي عندنا نقدر نصنع أشياء مميزة جدا طالما إن الإحساس بالصورة موجود.

* استفدت من هالدروس :
هنا – هنا

عند النقل يجب ذكر المصدر لو سمحت .

السلام عليكم..
رشا تقول إني هالفترة متغيرة جداً لاني صرت أرد على التلفون على طول
لدرجة إني أول ما أقول : ألو ، أحس رشا تتنح شوي ، بعدين فكرت حسيت كلامها صدق يعني ألواني في الصور لاحظت إنها متغيرة خخخخخخ ألوان بلوقي مدري كيف تجرأت على لون فاتح ومشرق كذا ؟ بعدين دايمن عروب تقول لي أشياء انه مب إنتي مثلا ماحسيتك بهالشيء هل هي ياترى فترة جديدة في حياة نوال ؟ <—لايكثر .
والحين اللي أكد لي التغير إني قاعدة أنزل طريقة حلى …..!! ستين علامة تعجب ماقد تخيلت أبد إني بتكلم في شؤون المطبخ وأنافس photon .. ببساطة لأني من عداد الفاشلين والفاشلات فيه.
عروب لاتناظرين وتقولين : طه طه طه ! اعترفي ان نص طبخاتك اللي تسوينها في الغدا مني ؟

أعزائي القراء أقدم لكم الحلا الذي شكله هكذا:

ويقال والله أعلم إنو اسمه السنمون الكذّاب، مع إني ما احب الكذب بس الظروف..

المقادير :

* كب كيك cup cake لوزين.. لحد يجيب شيء غير لوزين رجاءن ( يكون جواته تشاكلت او توفي حسب الرغبة ) .

مقادير الخلطة الأولى:
* ملعقة كبيرة حليب بودرة.
* ملعقة كبيرة قرفة.
* ملعقة كبيرة نسكافيه.
* نص ملعقة كبيرة سكر.
* بيالة موية.
* نص بيالة زيت.
* بيضة واحدة.

مقادير الخلطة الثانية:
* 6 حبات جبن كيري.
* علبة حليب نستلى كبير.

#تخلطون مقادير الخلطة الأولى في الخلاط بعدين تنحط في قدر على نار هادئة بعدين نحرك نحرك لمن يصير الخليط ثخين شوي بس أهم شيء مايتكتل لو يتكتل ما اعرفكم والوجه من الوجه أبيض بس أختي تقول لو تكتل خل يحركونه بملعقة البيض اللي صايرة كذا كذا كذا أسلاك .
بعدين نصب بمقدار ملعقة كبيرة تقريبا على كل كب كيك من هالخليط..، بعين ندخلهم الفرن عشان تنشف الخلطة وتتشربها الكيكة شوي.

نطلع الكب كيكات من الفرن ونضيف لكل كيكة مقدار ملعقة كبيرة من الخليط الثاني بعد خلطة في الخلاط برضو ..
بعدين نرجع ندخلها الفرن مرة ثانية لمدة خمس دقائق .. بعد مانطلعها من الفرن نحط فوقها لوز مبشور محمص ( يتحمص بقليل من الزيت على النار ) + عين الجمل ( من أي محمصة ).
بعدين نحط هيرشي شيرا ( تشاكلت + توفي ) .. أخر شيء ندخلها الثلاجة بعدين تقدم مع القهوة ..

السلام عليكم ورحمة الله وبركاته،
حسيت لازم أكثف البوستات عن أي شي عملته واشرح خطواته
حتى أقدر أفيد اللي حاب تغليف البوكسات والكولاج بشكل عام ..
ان شاء الله بغثكم

*

كنت محتاجة قبل كم يوم بوكس صغير بحط فيه قصاصاتي وبقايا الأشياء اللي ماتنكب بعد الكولاج
يعني قصاصات مجلات او جرائد ممكن استفيد منها بعدين ..
كنت ابغى البوكس صغير وما ياخذ مني مساحة وسهل في حمله وما يعذبني ..
بوكسات الجزم الله يكرمكم ما حسيتها تناسبني ولا هي عملية ، أخص منها اللي لها كوفر منفصل
فلقيت كرتون التمر أحسن حل وأفضل طريقة وما يعذب في الاستخدام والتغليف.

اخذته وطلعت أغراض الكولاج ، غطيته من جوا ومن برا بكيسة زارا – لون اسود،
وبديت اشتغل على الزينة زي ما انتم شايفين بالصورة ..

* غطيت الجهات الأربعة من الداخل ، حتى يكون الشكل انسب
* غطيت الجهة العلوية بكيس زارا ،
* الجوانب غطيتها بخامتين ( كيس زارا + رولات تجي بالمكتبات (ما اعرف اسمها) وبألوان متعددة ، انا اخترت ذهبي وفضي)
* لصقت قطعة من الكيس وبعدها قطعة من الخامة هذي .. من كل الجمبين زي ماتلاحظون بالصورة ..
* لمن انهيت الشكل الأولي للبوكس ، صار وقت الـ additions ، اخترت اني اصلح البوكس من فوق ومن جمب بريبونز منقطة

* استخدمت هذي الريبونز (من محل الكلف) ( وقريب راح ارفقها كـ ستوكات تقدرون تسفيدون منها في التصميم الرقمي(

حاولت اغير واستخدم كذا لون ، وما اجلس على لون واحد او لونين ،
* بعدها استخدمت خامة خيوط زي الحبل (مكتبة الشرق) لتزيين البوكس من الأعلى ،
* ومن الجمبين الأمامي والخلفي لصقت ورق جرايد ، وركبت زر خشبي ( من محل الكلف )

والنتيجة النهائية زي ماتشوفون هنا :

اضغط / ي للتكبير ، لتفاصيل البوكس

/
مرحبا جميعا .. لي تقريبا 5 شهور ما عملت ولا كولاج ولا مسكت أغراض الكولاج ولااا شي ..آخر مره سويت كولاج كان على بداية رمضان كان الكولاج بطاقة مباركة بالشهر مقدمة من جمعية الثقافة و الفنون ..واليوم عشان بكرا دوام حسيت إني حنيت للكولاج ..

فعشان كذا حبيت احط بالبلوق خطوات كولاج عملته بالصيف يمكن اتشجع وأسوي ،

و عشان اللي حاب ياخذ فكرة يتعلم ويستفيد ..وبرضو حلو تشوف كواليس عمل ../أول حاجة احتجت لـ :

مقص ، صمغ ، قلم رصاص ، قلم اسود حبر ( انا استخدمت قلم رمادي )ألوان خشبية ، ورق جرايد ،

ورق كراسة سادة أو ورق فيه رسمات او نقشات خفيفة/

خامة للتزين من الاطراف ( اخترت هنا كاروهات وهو عبارة عن “طور” قماش ) ..

اول شي أخذت ورق الكراسة واخترت لون فاتح – سادة

وخليته هو الـ backgroundوبعدين قصيت من القماش الكاروهات بشكل طولي لتزيين الحواف ..

بهالشكل :

/بعد اللصق والتثبيت ، نبدا نزين جوا الكولاج ..اخترت هنا أني ألون على ورق الجرايد ،قصيت شكل قلب زي هنا

واخترت اللون الاحمر لتلوين القلب /

،

بعد كذا نرسم الغيوم بنفس الطريقة ..ونلونها باللون الازرق بنفس الطريقة بعد القص ،

واللي يحب يلون قبل القص مو مشكلة برضو ..

/

نثبت مكان القلب في السماء ونرسم خيط طويل لـحد يد الشخصية اللي حابين نرسمها .

طبعا كل شخص يرسم بنته على كيفه

ملابس البنت ( ورق كورشيه ذهبي وأسود )وشعرها صوف وهنا اكتمل شكل البنت ،

واكتملت العناصر الأساسية للكولاج ..بقى الرتوشاضفت ورود وفراشة ..حوالين البنت حتى

تعطي منظر جمالي ولطيف وكيوت ..طبعا العشب الأخضر قطع تكون جاهزة وبألوان متعددة ..من أي مكتبة ..وهذا العمل النهائي :

//

الأغراض جدا بسيطة متوفرة في أي بيت ../
1- ادعوا لي أمي توافق نبني غرفة بالسطح عشان ورشتي للكولاج
2- كـ متذوقين – هاوين او حتى محترفين أيهم تشوفوني افضل فيه ؟ الكولاج أو التصوير ؟
أحتاج رأيكم بشدة ..